Hdră “Yan mnga mđrăm mbĭt bi răng kriê êa ksĭ  – Tết jiă klei khăp lĭng kahan hŏng mnuih ƀuôn sang” mkŏ mjing hlăm ai êwa h’uh mđao, klei khăp. Dŭm klei kdŏ muiñ bi mni kơ êa ksĭ, plao ksĭ lăn čar, rup mơ̆ng kahan êa ksĭ dôk mă bruă hlăm dŭm boh kŭmpăn gak răng, dŭm anôk ra đa, sang pra DK1... Lehanăn yan mnga lăn čar mâo leh lu ai tiê dưi bi êdah, lŏ hyuă kjăp hĭn klei thâo bi khăp lĭng kahan hŏngmnuih ƀuôn sang krĭng êa ksĭ, plao ksĭ, krĭn ghang ksĭ nah dhŭn lăn čar. Đại tá Phạm Ngọc Quý – Khua bruă kđĭ čar krĭng 2 Kahan êa brei thâo:

Hdră “Yan mnga mđrăm mbĭt bi răng kriê êa ksĭ  – Tết jiă klei khăp lĭng kahan hŏng mnuih ƀuôn sang” ƀri wưng Tết Nguyên đán hdơr knga kơ dŭm gŏ sang,  lehanăn phung knŭk kna dlăng ba ti alŭ wăl, êpul êya mâo klei bi đru sa kdrêč kơ  phung dôk găn hlăm klei dleh dlan. Hŏng phung čô anak mnuih trah mă kan mâo êpul êya lĭng kahan đru dlăng ba, hdră anei ăt mâo đru kơ phung hđeh, lehanăn kơ găp djuê digơ̆ drông Tết kuh kŭm, djăp ênŭm hĭn. Mơ̆ng anăn, hyuă kjăp hĭn klei thâo bi mguôp lĭng kahan lehanăn mnuih ƀuôn sang hlăm klei hlue ngă bruă čuăn thŭn 2026

Tui si Đại tá Đỗ Hồng Duyên, K’iăng kiă kriê bruă kđi čar kahan êa krĭng 2: Hdră “Yan mnga mđrăm mbĭt bi răng kriê êa ksĭ  – Tết jiă klei khăp lĭng kahan hŏng mnuih ƀuôn sang” jing wưng čiăng kơ phung knuă druh, lĭng kahan mbĭt hŏng mnuih ƀuôn sang bi kah mbha klei mơak drông Tết, lar lu klei khăp, lŏ bi kuč klei h’uh mđao hĭn mơ̆ng yan mnga krah angĭn lehanăn êa poh yă anei. Mơ̆ng anăn, đru bi hâo hưn, mjuăt bi hriăm kơ dhar kreh Tết djuê ana, lŏ bi kơrŭ ai tiê klei thâo khăp hlăm grăp čô knuă druh, hđeh êdam êra.

Bi kah mbha klei mơak hlăm hdră anei, aduôn Bùi Thị Thu Hương – K’iăng khua knơ̆ng bruă sang čư̆ êa ƀuôn hgŭm Long Sơn, ɃP. Hồ Chí Minh, brei thâo: Hlue ngă bruă sang čư̆ êa dua gưl, phung kahan êa mđrăm mbĭt hŏng mnuih ƀuôn sang hlăm lu thŭn mă bruă:

 “Alŭ wăl sa ai mbĭt hŏng hmei hlăm hdră bi mguôp lĭng kahan – mnuih ƀuôn sang, phung trah mă kan, kiă kriê êa ksĭ. Kahan êa mâo klei mđing uêñ kơ mnuih ƀuôn sang, duh mĭn kơ klei hdĭp mnuih ƀuôn sang bi h’uh đao, êđăp ênang hlăm klei  kiă kriê êa ksĭ, mâo mđĭ ai wăt hlăm klei hdĭp.”

Ba hriê klei hdĭp kơ dŭm gŏ sang knŭk kna dlăng ba, bruă anei lŏ đru kơ phung hđeh hriăm hră jing anak aneh phung trah mă kan mâo leh kahan êa krĭng 2 đru rông ba. Adei Lê Triệu Tuấn Việt, hđeh hriăm hră sang hră gưl dua Bình Châu 2, hŏng klei mơak lač:

 “Kâo mâo tŭ mă mnơ̆ng mơ̆ng di amiêt, bi mneh lĭng kahan mđup brei kâo mơak snăk. Kâo mâo diñu đru hlăm klei hriăm hră mơar, thŭn leh êgao kâo hriăm hŏng klei tŭ dưn. Mgi dih kâo srăng ngă kahan êa , kyuadah kâo mâo leh klei di mneh čung ba, čiăng kơ mgi dih prŏng kâo srăng jing lĭng kahan nao răng mgang klei êđăp ênang lăn čar.”

 Mâo ai tiê msĕ snăn mơh, amai Ngô Thị Quốc, lač:

 “Kâo bŏ hŏng klei mơak lehanăn lač jăk kơ lĭng kahan đru ba lehanăn dlăng kriê kâo. Grăp wưng yan Tết truh kahan êa krĭng 2 hriê mđĭ ai lehanăn mâo mnơ̆ng mđup brei kơ gŏ sang hmei, đru kơ gŏ sang hmei mdul klei ktrŏ. Hmei amâo lŏ mâo klei mkăn ôh knŏng lač jăk lu snăk kơ lĭng kahan êpul kahan êa, hơêč hmưi kơ phung lĭng kahan mâo sa yan mnga bŏ hŏng klei mơak mñai, h’uh mđao.”

Hdră “Yan mnga mđrăm mbĭt bi răng kriê êa ksĭ  – Tết jiă klei khăp lĭng kahan hŏng mnuih ƀuôn sang” jing leh bruă ngă bŏ hŏng klei khăp, bi êdah ai tiê “mnăm êa hdơr kơ hnoh”, knhuah bhiăn mâo leh “Lĭng kahan lehanăn mnuih ƀuôn sang sa ai tiê, mơ̆ng anăn lŏ bi klă hĭn bruă klam, ai tiê klei đăo knang mơ̆ng knuă druh lĭng kahan krĭng dua kahan êa hŏng mnuih ƀuôn sang alŭ wăl, lehanăn anak aneh phung trah mă kan – jing leh phung hrue mlam kiă kriê răng mgang êa ksĭ, mđrăm mbĭt hŏng kahan êa yang ƀuôn Việt Nam răng mgang kjăp klei dưi êngiê êa ksĭ, plao ksĭ hing ang kơ lăn čar./.