Thŭn Ất Tỵ 2025, lăn čar drei găn leh hlăm sa wang êlan kruak knăl lu klei yuôm bhăn, mâo klei yuôm bhăn êdi, lehanăn mâo ba wĭt leh lu boh tŭ dưn năng myưng m’ang, mbĭt anăn ăt jing sa thŭn lăn čar drei găn lu klei dleh dlan, klei lông dlăng, hŏng dŭm klei bi mlih prŏng, ktrŏ, dleh thâo mkă kơ boh klei dôk găn dlông rŏng lăn lehanăn hlăm alŭ wăl, mbĭt hŏng klei yan adiê amâo mâo jăk, ba leh klei luič liê prŏng, mâo lu klei ênguôt hnĭng kơ mnuih ƀuôn sang drei.

Hŏng ai tiê klei mĭn kjăp, čŏng kpưn đĭ mơ̆ng kluôn Đảng, jih jang djuê ana lehanăn klei thâo bi đru mơ̆ng mah jiăng ala tač êngao, drei dưi bi leh ênŭm jih jang ênoh čuăn kčah, hŏng lu gru knhăl jăk: Hnŭk êngiê, čŏng dưi kiă kriê, hluh lir kluôm ênŭm lăn čar, anôk hdĭp mda êđăp ênang, klei đĭ kyar dôk hlăm ênoh kdlưn hlăm tar rŏng lăn, jing leh ala čar mâo hnơ̆ng hrui wĭt kah knar kdlưn hĭn, klei hdĭp mda ala ƀuôn mâo duh mĭn, bruă kđi čar, yang ƀuôn hơĭt kjăp, bruă lĭng kahan, bruă răng mgang klei êđăp ênang, lehanăn hyuă kjăp klei thâo bi mguôp hŏng ala tač êngao, k’hưm mơ̆ng Việt Nam lŏ dơ̆ng mđĭ dlông rŏng lăn, mjing atur yuôm bhăn pioh kơ lăn čar čhuang hlăm  ênuk gưl mđĭ kyar mrâo.

Čhuang hlăm thŭn mrâo Bính Ngọ 2026 – Thŭn tal êlâo hlue ngă hdră mtrŭn klei bi kđĭn prŏng 14 mơ̆ng Đảng, hŏng knhuah gru thâo khăp kơ lăn čar, ai tiê klei thâo bi mguôp, klei mĭn kjăp, lehanăn klei êpa mhao lŏ bluh đĭ, kluôm Đảng, jih jang mnuih ƀuôn sang, jih jang lĭng kahan drei srăng lŏ bi mguôp, sa ai tiê mbĭt, pai mă djăp klei găl, klei myun, hgao klei dleh dlan, klei lông dlăng, dưn yua jih klei ktang mơ̆ng ai tiê čŏng pô, thâo gĭr, pưng myưng mơ̆ng djuê ana, amâo mâo mdei dưi mđĭ kyar, jih ai tiê ngă bi tŭ dưn, bi sĭt dŭm mta kñăm rŭ mdơ̆ng lăn čar Việt Nam êđăp ênang, hnŭk êngiê, ngă phŭn mil pô, mdrŏng sah, kreh dhar, jăk yâo.

Hlăm klei mơak kkuh drông yan mnga mrâo, lŏ sa blư̆ dơ̆ng, kâo hơêč hmưi kơ mnuih ƀuôn sang, dĭng kna, lĭng kahan kluôm ala lehanăn mnuih ƀuôn sang drei ti ala tač êngao thŭn mrâo mâo klei tŭ dưn mrâo, klei tŭ jing mrâo, djuê ana lehanăn mnuih ƀuôn sang drei knư̆ hrue knư̆ mdrŏng sah, maoa klei hdĭp trei mđao, hnŭk ênhiê, jăk mơak.

Alum kkuh hlăm klei khăp lehanăn klei dưi!