Mđing uêñ kơ krĭng knông lăn anei, dŭm thŭn êgao, hdră ala čar kñăm kơ bruă bi hrŏ ƀun hŏng klei kjăp mâo duh bi liê leh bruă mkra êlan klông, knơ̆ng mbông êa, mbĭt hŏng bruă lăm lui sanh hlang tĭ ƀrôč, đru mnuih ƀuôn sang hơĭt klei duh mkra. Thị Brao, mnuih mâo k’hưm hlăm Bon Bu Prâng 1, ƀuôn hgŭm Quảng Trực brei thâo, mnuih ƀuôn sang M’Nông bi lar nanao knhuah gru cách mạng, bi mguôp mkŏ mjing ƀuôn sang knư̆ hrue knư̆ mdrŏng sah.

“Ƀri thŭn mrâo, kâo čang hmăng mnuih ƀuôn sang mâo nanao klei suaih pral, thâo bi mguôp, thâo bi khăp, thâo bi đru hdơ̆ng găp, amâo mâo klei bi kah ana mbha djuê, mđrăm mbĭt mđĭ kyar bruă duh mkra, kriê pioh knhuah gru dhar kreh ƀuôn sang. Bon Bu Prâng 1 hmei anei jing krĭng phŭn krŭ kdơ̆ng, mơ̆ng ênuk đưm hlŏng kơ ară anei mnuih ƀuôn sang thâo kriê pioh jăk klei tŭ dưn kơ knhuah gru dhar kreh jăk siam. Klei hdĭp mda mnuih ƀuôn sang ƀrư̆ hrue mâo klẻi đĭ kyar, mnuih ƀuôn sang thâo hriăm mjuăt, hriăm êmuh klei kreh knhâo, ba yua kơ bruă pla mjing ksum kphê. Mơ̆ng anăn, đru mkŏ mjing klei hdĭp trei mđao jăk mơak”.

Mnuih ƀuôn sang Bahnar ti să Ia Băng čar Gia Lai, drông yan mnga mrâo Bính Ngọ hŏng klei mơak mơ̆ng klei bi mlih kluôm dhuôm. Mơ̆ng klei knŏng thâo pla mdiê kuê, ară anei mnuih ƀuôn sang tui hriăm, ba yua kdrăp mrâo hlăm bruă rông mnơ̆ng, pla dŭm mta ana sui thŭn… mâo hnư hrui wĭt đĭ. Pui kmlă, êlan klông, sang hră, sang êa drao gŭn dưi duh bi liê prŏng siam, lu gŏ sang blei mprăp leh êdeh ôtô, maĭ mŏk mkăp kơ bruă mkra mjing lehanăn yua hlăm aguah tlam…

Klei hdĭp dưi mkra mđĭ, đăo knang hlăm Đảng, Knŭk kna ƀrư̆ hruê hơĭt kjăp. Ƀuh klei bi mlih anei, Đư̆ng, mnuih ƀuôn sang ƀuôn Biă Tih, să Iă Băng, brei thâo:

“Ară anei, kyua pla kphê, ênoh čhĭ kphê đĭ, lu mnuih ti dŭm krĭng ƀuôn sang blei leh ôtô, blei êdeh kai, êdeh ph’phŭt grăp sang mâo sơaĭ, mâo sang mâo dŭm boh êdeh mtam. Klei hdĭp ară anei jăk leh, hriăm lu mơ̆ng ayŏng adei djuê lar snăn yơh klei hdĭp trei mđao, djăp ênŭm leh msĕ hruê anei”.

Ti ƀuôn hgŭm Ngọk Tụ (čar Quảng Ngãi), A Xương, mnuih Xơ Đăng, jing đảng viên mda asei, jing khua bruă Mặt trận, hlŏng jing khua êpul răng mgang klei êđăp ênang ƀuôn Dak Pung. Ñu brei thâo, ƀuôn mâo leh klei đĭ kyar kjăp, kyua mâo klei bi mlih knhuah mĭn, hdră mă bruă, hlue ngă jăk hdră êlan mơ̆ng Đảng, klei bhiăn knŭk kna, mâo klei bi mguôp, thâo bi đru hdơ̆ng găp hlăm klei hdĭp. chính sách pháp luật của Nhà nước; đoàn kết, giúp đỡ nhau trong cuộc sống. A Xương brei thâo:

“Ară anei, mnuih ƀuôn sang hlăm alŭ wăl hlăk thâo djă yua dŭm hdră êlan mrâo, klei bi mlih mrô... Leh mâo hdră êlan mơ̆ng knŭk kna, hmei bi lar, hâo hưn hoưng mnuih ƀuôn sang, thâo săng hĭn kơ kdrăp mrô, thâo djă yua djăp mta bruă hŏng kdrăp mrô, thâo yua app VNeID, ktrâo atăt mnuih ƀuôn sang thâo ƀuh dŭm hdră êlan mơ̆ơ̆ng knŭk kna, kơ klei ngă hră mơar asei, gŏ sang pô... Kâo mơak ară anei dŭm gŏ sang hlăm ƀuôn mâo leh klei bi mlih hlăm klei mĭn, hdră mă bruă, jhŏng bi mlih mjeh hŏng dŭm mjeh mboh hĭn hlăm đang hma pô, pla mjing dŭm mta ana ksu, kphê, lehanăn ana boh kroh. Mnuih ƀuôn sang sa ai, klei mă bruă mâo boh mnga, kpưn đĭ nao kơ mdrŏng”.

Mơak hŏng klei hdĭp ƀrư̆ hruê ƀrư̆ bi mlih, Nay H’Thu, Kơiăng khua bruă Đảng ƀuôn Tong Sê, să Ia Pa, čar Gia Lai, hơ̆k mơak brei thâo, đảng viên brei ba akŏ hlăm djăp bruă čiăng kơ ƀuôn sang trei mđao hĭn.

“Thŭn hđăp êgao leh, thŭn mrâo truh, klei čang hmăng mơ̆ng kâo jing gŏ sang suaih pral, êđăp ênang. Kâo čang hmăng phung čô anak jăk ênang, kriăng hriăm hră čiăng kơ êdei anăp jing mnuih tŭ dưn kơ ala ƀuôn. Kâo pô ăt mtă kơ pô gĭr hdĭp jăk, mđing truh kơ anăp, jing gru mngač kơ mnuih ƀuôn sang hlăm ƀuôn hluê ngă, hrăm mbĭt mđĭ kyar bruă duh mkra, mkŏ mkra klei hdĭp jăk siam hĭn”.

Yăl dliê kơ klei ƀơ̆ng Tết, Y -Tloi Niê, Khua ƀuôn Čư̆ Păm, ƀuôn hgŭm Dăng Kang, čar Daklak brei thâo, thŭn leh êgao mnuih ƀuôn sang hlăm ƀuôn tuôm hŏng lu klei dleh dlan kyua yan adiê ngă. Mâo klei mđing, klei đru mơ̆ng knŭk kna, mnuih ƀuôn sang hơĭt leh klei hdĭp drông yan mnga mrâo. Ñu čang hmăng thŭn mrâo klei hdĭp mnuih ƀuôn sang krĭng êa lip srăng hơĭt ênang mơak mñai:

“ Kâo čang hmăng hlăm thŭn mrâo, knŭk kna lŏ dơ̆ng mđing, đru kơ mnuih ƀuôn sang lu hĭn čiăng kơ mnuih ƀuôn sang trei mđao. Mbĭt hŏng anăn, kâo čang hmăng lŏ mâo thiăm dŭm hdră êlan đru kơ phung mbruă thâo tông čing čhar, đru kơ digơ̆ mđĭ hĭn ai dưi thâo kriê pioh, lehanăn mđĭ bi lar knhuah gru dhar kreh djuê ana.”

Thŭn 2025, Êpul êdam êra să Hòa Ninh, čar Lâm Đồng pŏk ngă lu hdră tŭ yuôm lehanăn klă sĭt hlăm klei hdĭp. Êpul bi hgŭm hŏng Sang hră gưl prŏng Đà Lạt mkŏ mkra leh 2 hdră bruă “Guh mngač krĭng ƀuôn sang” ti alŭ 5a, 10b; Mbĭt anăn jao dŭm êtuh hnư mnơ̆ng mâo hdruôm hră, mnơ̆ng yua hriăm hră kơ phung hđeh ƀun hriăm thâo; Mkŏ mjing hdră mtô mblang kơ hdră gang mkhư̆ matuĭ, klei bi čăm biêng hlăm sang hră hŏng phung êdam êra. Êpul êdam êra nao hgŭm kriê dlăng tŭ dưn phŭn mkăp prăk mơ̆ng Knơ̆ng prăk đru ba ala ƀuôn hŏng ênoh nư giăm 30 êklai prăk đru kơ dŭm êtuh čô êdam êra mâo anôk jưh knang kjăp čiăng mđĭ kyar bruă duh mkra – mnia mblei. Amai Ka Sôi, Khua bruă Đoàn êdam êra să Hòa Ninh, čar Lâm Đồng brei thâo:

“Čiăng mkra mđĭ klei hdĭp mnuih ƀuôn sang krĭng čư̆ čhiăng, kâo čang hmăng Knŭk kna srăng mâo dŭm hdră mtrŭt mđĭ bruă dhar kreh lehanăn mjuăt bi hriăm knuă druh jing mnuih djuê ƀiă ti alŭ wăl. Hŏng êpul êdam êra, kâo mtă kơ phung anak čô hdơr ko asăp Awa mtă kơ ai ktang bi hgŭm mguôp jih jang djuê ana.

Grăp čô êdam êra jing sa gru mngač kriăng kơ bruă, duh myơr klei thâo čiăng mkŏ mkra ƀuôn sang. Knŏng bi hgŭm čiăng bi mguôp sa ai, snăn kơh drei dưi rơ̆ng kjăp knhuah dhar kreh lehanăn ba ƀuôn sang đĭ kyar”.

Leh bi mŭt mơ̆ng dŭm boh să Gia Bắc, Sơn Điền (êlâo dih), ƀuôn hgŭm Sơn Điền mrâo dôk hlăm klei dleh dlan hĭn čar Lâm Đồng, hŏng ênoh lu mnuih djuê ƀiăTi krĭng taih kbưi, phung hđeh êdam êra hlăm ƀuôn hgŭm hlăk dưn yua jih ai mda asei pô rŭ mdơ̆ng ƀuôn sang. Amai Ka Hành- Khua bruă êdam êra ƀuôn hgŭm Sơn Điền, brei thâo, lŏ bi hdơr klei Awa Hồ "Sa thŭn kčưm mơ̆ng yan mnga, sa klei hdĭp kčưm mơ̆ng thŭn dôk mda. Thŭn mda asei, jing yan mnga kơ yang ƀuôn”.... Êpul êdam êra ba anăp hlăm djăp bruă bi ktưn:

          “Hlăm thŭn mrâo 2026, kâo čang hmăng mâo lu klei mrâo. Anăn jing iêo jak jih ai ktang đru kơ hđeh hriăm hră dôk hlăm klei dleh dlan, mkŏ mjing dŭm bruă dhar kreh, mjuăt asei mlei, lehanăn mâo klei mĭn mkŏ mjing êpul hgŭm tông čing čhar kơ phung hđeh ti nei. Dŭm mta bruă mkăn hmei mĭn mkŏ mjing dŭm bruă êdam êra msĕ si: Êlan hla čhiăm gru “Mngač - mtah - siam - doh”, pla mnga ti knưng bi hdơr kơ phung êngiă asei ƀuôn hgŭm Sơn Điền; mkŏ mjing bruă gan gmkhư̆ klei hđeh djiê mngăt hlăm êa... Kâo čang hmăng kơ phung hđeh gĭr hĭn hlăm klei hriăm hră mơar čiăng mâo klei thâo săng hĭn, thâo duh ƀơ̆ng, mđĭ kyar gŏ sang lehanăn ƀuôn sang pô...”.

Amai H’Vinh, êdam êra să Đức An, čar Lâm Đồng jing sa hlăm dŭm čô êdam êra êdah kdlưn, nao hgŭm hlăm hdră bi ktưn ti alŭ wăl. Mđĭ lar bruă klam ba anăp mơ̆ng phung êdam êra hlăm klei hluê ngă Hdră mtrŭn Klei bi kƀĭn bruă Đảng dŭm gưl, H’Vinh mbĭt hŏng lu phung đoàn viên, êdam êra hlăm ƀuôn ba akŏ hlăm hdră ngă bruă duh mkra pla mjing, mkŏ mkra klei hdĭp kreh dhar, đru mkŏ mkra ƀuôn sang ƀrư̆ hruê ƀrư̆ mlih mrâo, đĭ kyar kjăp. Amai H’Vinh, brei thâo:

“Thŭn 2025 jing sa thŭn tŭ jing êdi mơ̆ng ala č ardrei, kruăk klei tŭ jing mơ̆ng Klei bi kƀĭn Đảng. Mơ̆ng dŭm hdră êlan mơ̆ng Klei bi kƀĬn, hŏng klei gĭt gai mơ̆ng bruă Đảng să, ƀuôn hgŭm mđing dlăng leh kluôm ênŭm truh kơ hdră mđĭ kyar bruă duh mkra, dhar kreh, klei hdĭp mnuih buôn sang, mơ̆ng anăn mjing dŭm klei bi mlih jăk siam, kruăk gru jăk siam hlăm klei hdĭp mnuih ƀuôn sang. Jing êdam êra, kâo pô srăng gĭr hriăm hră mơar, mjuăt bi hriăm, nao hgŭm hlăm hdră Đoàn ti alŭ wăl, mđĭ lar ai tiê ba anăp mơ̆ng phung êdam êra, đru mguôp hlăm hdră mđĭ kyar mơ̆ng ƀuôn sang”./.