Aguah mbruê 27/9, Êpil khua gĭt gai leh anăn phung mnia mblei mda asei tar rŏng lăn (JCI) ti Việt Nam bi mguôp hŏng Êpul phung mniê mnia mblei ƀuôn prŏng Ƀuôn Ama Thuôt leh anăn Bruă êdam êra kdriêk Čư̆ Mgar mkŏ mjing hdră mđup brei măi tĭnh leh anăn hdruôm hdră kơ hđeh sang hră ti sang hră gưl 1 Y-Jut, să Ea H’Đĭng, kdriêk Čư̆ Mgar, čar Dak Lak.

Hdră mđup brei leh 30 boh măi tĭnh leh anăn 2000 akŏ hdruôm hră hŏng ênoh jih jang giăm 200 êklăk prăk. Hluê si Nguyễn Xuân Nhạc, Khua kiă kriê sang hră gưl 1 Y-Jut, hlăm sang hră ară anei mâo 670 čô hđeh sang hră, hlăm anăn hđeh sang hră mnuih djuê ƀiăn mâo 70%, dŭm hlâo măi tĭnh leh anăn hdruôm hră hriăm, hdruôm hdră kreh knhâo leh anăn hdruôm hră rup srăng đru kơ phung hđeh sang hră dưi mâo klei hriăm tin học, klei hưn mthâo mrâo mrang leh anăn mđĭ dhar kreh dlăng hră. Hluê anăn, lŏ mkŏ mjing boh kdrŭt kơ phung hđeh ti sang hră gĭt hriăm hră mơar. Mbĭt hŏng dŭm mta bruă mđup brei 30 boh măi tĭnh leh anăn hruôm hră hriăm kơ hđeh sang hră ti sang hră gưl 1 Y-Jut, mlam mbruê, anôk bruă lŏ mkŏ mjing hdră “Knăm mlan Pur kơ adei” leh anăn mđup brei 400 hnư mnơ̆ng kơ phung hđeh điêt ti ƀuôn Đrao, să Čư̆ Dliê Mnông, kdriêk Čư̆ Mgar.