Hlăm anăn, mâo 3 Hdră duh bi liê mkra êlan êran pral Khánh Hòa – Ƀuôn Ama Thuột wưng 1 mâo boh taih dlông 48km, mơ̆ng Km69+500 (să Ea Kar) truh Km117+593 (să Ea Knuêc), găn 7 să mâo Ea Ô, Vụ Bổn, Tân Tiến, Krông Pač, Ea Knuêč, Ea Ning lehanăn Ea Ktur.

Hdră anei đru mkŏ Lăn dap kngư hŏng krĭng ksĭ Dhŭng kwar Krah, mđĭ lar boh tŭ dưn mơ̆ng dŭm hdră bruă nah gŭ hlăk lehanăn dôk duh bi liê, mơ̆ng anăn pŏk mlar wăl anôk đĭ kyar, mđĭ ai bi ktưn, rơ̆ng hdră lĭng kahan – răng mgang klei êđăp ênang lehanăn mtrŭt mđĭ hdră đru mơ̆ng ala čar. Mbĭt anăn, Hdră duh bi liê mkra êlan Hồ Chí Minh krĭng êlan dêč nah Ngŏ Ƀuôn Ama Thuôt mâo boh taih dlông 39,6 km, anôk mkŏ tal êlâo ti să Čuôr Dăng lehanăn anôk mkŏ knhal tuič ti să Hòa Phú, găn 5 să, ƀuôn hgŭm mâo Čuôr Dăng, Ea Kao, Hòa Phú, Ea Knuêc lehanăn Ea Ktur.

Hdră đru bi hrŏ klei lu đei êdeh hlăm krĭng ƀuôn prŏng, mđĭ boh tŭ hdră ba yua êlan Hồ Chí Minh, mđĭ hdră mkŏ dŭm krĭng hŏng Lăn dap kngư, mkăp kơ hdră mđĭ kyar bruă duh mkra – ala ƀuôn, bi kjăp hdră lĭng kahan – răng mgang klei êđăp ênang hlăm krĭng. Ăt hlăm hruê anei, ti krĭng nah Ngŏ čar Dak Lak (Phú Yên hđăp), dŭm hdră phŭn mkăn ăy dưi ba yua, mâo hdră Wăl hiu čhưn mdei săn Cù Lao Mái Nhà ti să Ô Loan lehanăn 2 hdră ti ƀuôn hgŭm Bình Kiến lehanăn nah Dưr êlan Trần Phú, ƀuôn hgŭm Tuy Hòa, đru bi leh anôk bruă nah gŭ lehanăn mkăp djŏ hŏng klei čiăng đru kơ ala ƀuôn mơ̆ng mnuih ƀuôn sang alŭ wăl.