Boh sang tuôm jing boh tŭ mkiêt mkriêm lu thŭn mă bruă mơ̆ng ung mô̆ Lê Thị Minh Trang, alŭ Vĩnh Xuân, să Tuy An Tây, ară anei knŏng adôk jing kăm dlưh rai leh čư̆ nah tluôn klưh hroh. Tlam 19/11, sang mâo dŭm êlan kđang prŏng, bruă sang čư̆ êa hmao brei mbĕ đuĕ. Khădah snăn, knŏng leh sa mlam adiê hjan prŏng, boh sang dlưh rai kluôm.

“Gŏ sang hŏng mnuih ƀuôn sang tinei čang hmăng knŭk kna mdơ̆ng sang kơ mmnuih ƀuôn sang yơh, dôk snei dleh dlan snăk”.

Boh klei gŏ sang Trang ăt jing boh klei msĕ mơ̆ng 35 gŏ êsei mnuih ƀuôn sang brei mƀĕ đuĕ  ti alŭ Vĩnh Xuân. Hlue si Lê Minh Ý, Khua dlăng bruă Đảng hlŏng ngă Khua alŭ Vĩnh Xuân, êlâo kơ yan adiê ngă, mnuih ƀuôn sang hdĭp hŏng bruă pưk hma, pla mtei, kbâo. Leh gưn adiê hjan angĭn êbŭ mrô 13 ngă, djam tam ka hmao kơrŭ wĭt snăn gưl êa lip lêč êdei anăn ngă klưh hroh kjham, ngă kơ mnuih ƀuôn sang lĕ hlăm boh klei luč pưk sang, lăn mkra mjing. Ară anei, klei čang hmăng hĭñ jing mnuih ƀuôn sang hnưm hơĭt anôk hdĭp mda.

“Mrâo êgao Knơ̆ng bruă ăt mă leh klei blŭ mnuih ƀuôn sang, tŭ ư kơ bruă anei, mnuih ƀuôn sang čang hmăng mâo anôk dôk mrâo êđăp ênang hĭn. Čang hmăng mkra hnưm mâo anôk dôk hơĭt klei hdĭp mda, êđăp ênang.”

Phan Quang Phi, Khua Knơ̆ng bruă sang čư̆ êa să Tuy An Tây, brei thâo, bruă sang čư̆ êa să ksiêm dlăng leh, bi klin 49 gŏ êsei dôk hlăm wăl klưh hroh, mđing êlâo hĭn anôk dôk kơ 35 gŏ êsei mâo klei huĭ hyưt hĭn. Wăl anôk dôk mrâo mâo ruah hlăm să Tuy An Nam, sui hŏng anôk hdĭp mda hđăp hlăm brô 5km:

 “Alŭ wăl mjêč bi hgŭm hŏng să Tuy An Nam ăt msĕ mơh Anôk bruă kriê dlăng hbĭl bi leh hră mơar wăl anôk dôk mrâo snăn srăng mkŏ mjing dŭm boh sang anei. Čiăng rơ̆ng hnơ̆ng hlue si klei Khua knŭk kna gĭt gai.”

Klei năng mđing hlăm hdră pŏk ngă wăl anôk dôk mrâo jing klei mnuih ƀuôn sang bi tŭ ư hlăm wăl tŭ mă. Ti alŭ Quảng Đức, să Tuy An Nam – anôk mâo ruah mkŏ mjing wăl anôk dôk mrâo - mâo leh 17 gŏ êsei mnuih ƀuôn sang jao lăn, mjing keh lăn doh čiăng dăp anôk dôk kơ dŭm gŏ êsei klưh hroh. Nguyễn Thị Chín, Khua alŭ Quảng Đức, să Tuy An Nam brei thâo:

“Alŭ ăt mtrŭt mjhar mnuih ƀuôn sang tinei myơr lăn mjing klei găl kơ dŭm gŏ êsei mnuih ƀuôn sang klưh hroh lăn hriê tinei čiăng hrăm mbĭt hdĭp mda bi jăk mơak, mnuih ƀuôn sang tinei ăt sa ai tŭ ư. Mnuih ƀuôn sang tinei ăt mjing klei găl kơ dŭm gŏ êsei dleh dlan hĭn, msĕ si hla hluôm hruôm hla tĭ.”

Ai tiê bi  đru anăn mâo bi êdah klă hlăm klei bi mklă mơ̆ng Trương Thị Nhung, alŭ Quảng Đức, să Tuy An Nam, leh giăm 2 sao lăn gŏ sang ñu hlăm ênhă hrui mă čiăng lŏ mkŏ mjing anôk dôk mrâo.

 “Kâo tŭ ư, dlăng msĕ si pô đru kơ phung mâo lăn klưh hroh leh, knŏng tla hnô kơ mnuih ƀuôn sang jing đưi leh.”

Čiăng mđĭ pral hnơ̆ng, khua gĭt gai čar Dak Lak hŏng dŭm knơ̆ng, dhar bruă djŏ tuôm leh anăn khua gĭt gai dua să Tuy An Tây leh anăn Tuy An Nam nao ti wăl lăn mâo ruah mjing anôk dôk mrâo kơ 35 gŏ êsei mnuih ƀuôn sang.  Wăl anei mâo ênhă hlăm brô 3 ha, mâo 52 kdrêč lăn mơ̆ng hlăm brô 20 gŏ êsei mnuih ƀuôn sang. Hlăm mmông mă bruă, Nguyễn Thiên Văn, K’iăng Khua Knơ̆ng bruă sang čư̆ êa čar Dak Lak mtă kơ dŭm knơ̆ng, dhar bruă bi hgŭm kjăp, mkŏ mjing êpul đru čiăng msir jih jang hră mơar hlue si klei bhiăn mjêč, bi hrŏ hruê mmông mprăp bi liê, rơ̆ng djăp klei găl hdră bhiăn čiăng hnưm pŏk ngă mkŏ mjing sang dôk kơ mnuih ƀuôn sang.

“Drei ba yua klei bhiăn mâo klei mdê hĭn hlăm hdră rŭ mdơ̆ng snăn brei hlue ngă hdră mjêč čiăng hlue ngă. Ƀiădah brei ngă mkiêt mkriêm, tŭ dưn hĭn, klă sĭt hĭn, ñĕ kơ klei luč liê mang, klei amâo jăk tăm mâo.”

 Bruă lŏ mkŏ mjing anôk dôk mrâo kơ 35 gŏ êsei mnuih ƀuôn sang krĭng klưh hroh lăn ti să Tuy An Tây amâo djŏ knŏng jing hdră msir êlâo hĭn čiăng rơ̆ng klei hdĭp mda kơ mnuih ƀuôn sang ôh ƀiădah lŏ bi êdah bruă klam mơ̆ng bruă sang čư̆ êa dŭm gưl, hrăm mbĭt bi hgŭm, bi đru hlăm êpul êpa.