Aguah hruê 1 Tết Dương lịch 2025, gưl phiơr mơ̆ng Vietnam Airlines mâo mrô VN1603 mơ̆ng Hà Nội – Ƀuôn Ama Thuôt trŭn leh ti tač êdeh phiơr Ƀuôn Ama Thuôt, čar Dak Lak mdiăng ba 120 čô tuê leh anăn phung mă bruă hlăm êdeh phiơr. Anei jing phung tuê tal 1 êklăk 500 êbâo leh anăn jing êpul tuê tal êlâo truh ti čar Dak Lak hlăm thŭn 2025 hŏng êlan êdeh phiơr.    

Ti tač êdeh phiơr Ƀuôn Ama Thuôt, knăm drông tuê gưl tal 1 êklăk 500 êbâo leh anăn êpul hiu čhưn ênguê tal êlâo hruê ti Dak Lak ƀri wưng tết dương lịch 2025 mkŏ mjing kdrưh kơăm hŏng klei tông čing leh anăn klei kdŏ mmuñ. Pô bi ala dhar bruă hiu čhưn ênguê leh anăn kriê dlăng tač êdeh phơir Ƀuôn Ama Thuôt mđup brei mnga leh anăn hnư mnơ̆ng drông phung tuê tal êlâo hriê hŏng čar hlăm hruê tal êlâo thŭn mrâo.

Myun jing tuê tal 1 êklăk 500 êbâo hriê ti Dak  Lak, amai Lưu Minh Lan, ti kdriêk čar Long Biên, Hà Nội bi êdah klei mgei ai tiê leh anăn hơ̆k mơak hŏng klei tŭ drông mơ̆ng čar Dak Lak hlăm dŭm hruê akŏ thŭn mrâo.

“Akŏ yan mnga thŭn mrâo mâo jih gŏ sang nao mbĭt, phung hđeh ăt mdei kyuanăn pô mâo sa hruê kăm dôk êjai tinei, čhĭ mnia êjai čuă dlăng êjai, nao dlăng dŭm anôk siam tinei. Kâo ăt nao leh ti đa đa anôk, gưl anei kâo nao ti Drai Săp leh anăn ênao Lăk.”

Knăm drông tuê tal 1 êklăk 500 êbâo leh anăn êpul phung tuê tal êlâo hriê ti Dak Lak ƀri wưng tết dương lịch 2025 jing bruă mkŏ mjing klei kñăm hlăm hruê tal êlâo hlăm thŭn mrâo čiăng mđĭ hĭn anăn knăl bruă hiu čhưn ênguê Dak Lak, iêo jak klei mđing mơ̆ng phung tuê hlăm leh anăn êngao lăn čar. Mbĭt anăn, anei ăt jing wưng čiăng hưn mdah dŭm anôk hiu čhưn ênguê jăk hŏng klei găl mđĭ kyar bruă hiu čhưn ênguê mơ̆ng čar, đru hlăm bruă mkŏ mjing anăn knăl bruă hiu čhưn ênguê Dak Lak. Aduôn Nguyễn Thụy Phương Hiếu, k’iăng khua knơ̆ng bruă dhar kreh, mjuăt asei mlei leh anăn hiu čhưn ênguê Dak Lak brei thâo:

“Knơ̆ng bruă ăt hmăng hmưi phung tuê hlăm gưl phiơr truh ti Dak lak srăng ƀuh mnuih Dak Lak mrâo mrang, jăk, khăp kơ tuê. Hĭn kơnăn, phung tuê anei srăng hâo hưn, mdah kơ rup anak mnuih Dak Lak hŏng gŏ sang, mah jiăng leh anăn diñu yơh jing phung mtô hưn mdah kơ Dak Lak hŏng dŭm klei jăk, đru mđĭ hĭn ênoh phung tuê hriê ti Dak Lak.”

Thŭn 2024, hnư hrui wĭt mơ̆ng bruă hiu čhưn ênguê ti Da klak đĭ êbeh 21% mkă hŏng thŭn êlâo. Anei jing klei bi knăl jăk hŏng Dak Lak hlăm klei gĭr mđĭ kyar dŭm mta mnơ̆ng dhơ̆ng mrâo, kñăm ba yua knhuah gru hlăm dhar kreh čư̆ čhiăng. Thŭn 2024, hnư hrui wĭt mơ̆ng bruă hiu čhưn ênguê kluôm čar Dak Lak mâo 1.255 êklai prăk, đĭ êbeh 21% mkă hŏng thŭn 2023, Dak Lak drông leh 1,5 êklăk gưl čô tuê. Tuê mơ̆ng ala tač êngao hriê ti Dak Lak ăt đĭ êbeh 34% mkă hŏng thŭn êlâo.

Klei êdah hĭn hlăm bruă hiu čhưn ênguê mơ̆ng čar mrâo êgao jing nao mbĭt hŏng bruă bi hdơr 120 thŭn hruê mkŏ mjing čar Dak Lak. Čar mkŏ mjing leh thiăm lu anôk hiu čhưn ênguê yang ƀuôn ti dŭm alŭ wăl, bi lar klei găl mơ̆ng grăp djuê ana mkŏ mjing klei mdê hĭn. Hlăm anăn, klei bi hmô Mkŏ mnơ̆ng kriê pioh “čĭng čhar Lăn Dap Kngư hlăm bruă hiu čhưn ênguê Ƀuôn Ama Thuôt – Dak Lak” srăng dưi pŏk mlar hlăm wưng kơ anăp. Lại Đức Đại, k’iăng khua knơ̆ng bruă dhar kreh, mjuăt asei mlei leh anăn hiu čhưn ênguê Dak Lak brei thâo, klei bi hmô srăng đru kơ mnuih ƀuôn sang thâo klă hĭn kơ boh tŭ mnơ̆ng kriê pioh pô dôk mâo, thiăm klei ktưn hưn leh anăn lŏ dơ̆ng čuê wăl dhar kreh čing čhar Lăn Dap Kngư, mkŏ mjing klei găl čiăng kơ čing čhar jing ai dưi kơ bruă hiu čhưn ênguê, mkŏ yang ƀuôn leh anăn mkŏ mjing hdră hiu čhưn ênguê mnơ̆ng kriê pioh.

“Srăng mâo klei bi mguôp kjăp hĭn, amâo djŏ knŏng ngă 1-2 klei bi hmô, ƀiădah năng ai srăng ngă lu klei bi hmô sa blư̆, dŭm gưl dưi lŏ čuê mbĭt hŏng klei nao hgŭm mơ̆ng phung thơ̆ng kơ bruă, phung mbruă. Klei bi klă mơ̆ng dŭm alŭ wăl čŏng pô ăt msĕ mơh dŭm hdră êlan duh bi liê mơ̆ng knơ̆ng bruă srăng mâo klei lŏ čuê hŏng adŭ hriăm mâo hnơ̆ng jăk leh anăn boh tŭ dưn hĭn”.