Hdră kdrêč 3 êlan dơ̆ng pral Khánh Hoà – Ƀuôn Ama Thuôt mâo boh taih êbeh 48 km, hŏng ênoh duh bi liê 6.765 êklai prăk. Truh kơ ară anei, phung ngă bruă dưi bi leh ƀăng mur, êlan mđuê̆ êa leh anăn rŭ mdơ̆ng mâo 22 boh kban, mâo 75%. Ƀiădah, klei brai čan knŏng mâo 1.525 êklai prăk, mâo 37%. Êpul kriê dlăng hră duh bi liê bruă êlan klông leh anăn bruă lŏ hma mđĭ kyar krĭng ƀuôn sang čar Dak Lak brei thâo, phŭn agha kyua anôk bruă ka ba jih êdeh êdâo mđĭ mmông mă bruă, phŭn mkăp lăn, boh tâo ka djŏ wưng kčah.

Blŭ hlăm klei bi kƀĭn, Trương Công Thái, k’iăng khua bruă sang čư̆ êa čar Dak Lak mñă kơ phung ngă bruă leh anăn đru srăng gĭr čiăng mđĭ hĭn ênoh êdeh êdâo, kdrăp yua leh anăn mnuih mă bruă čiăng rơ̆ng djŏ hdră kčah, mđĭ mmông mă bruă ăt ngă jăk. Truh leh mmông srăng mdei klei ngă bruă hŏng phung ngă bruă amâo mâo rơ̆ng djŏ kơ ênoh mnơ̆ng yua, klei ngă bruă, pô ngă bruă srăng đua klam hŏng pô duh bi liê.