Thŭn hriăm 2024 - 2025, gưl tal êlâo adŭ 12 Hdră mtô bi hriăm thŭn 2018, hŏng dŭm klei bi mlih phŭn, mơ̆ng hdră êlan mta phŭn truh kơ hdră mđĭ klei thâo mnuih hriăm. Ăt hlăm thŭn anei, klei bi lông gưl 3 mâo dŭm klei bi mlih kơ hdră bi lông, kñăm mđĭ klei bi mklă hnơ̆ng thâo hriăm mơ̆ng phung hđeh. Adei Lê Minh Hưng, adŭ 12, Sang hră gưl tlâo Ƀuôn Ama Thuôt, čar Dak Lak brei thâo snei:

“Klei bi lông thŭn anei mâo lu klei bi mlih, boh nik jing klei hriăm bi mguôp. Kâo ƀuh, brei pô tui ksiêm lehanăn hriăm lu hĭn, rơ̆ng dŭm klei thâo săng phŭn, lehanăn brei mâo klei mđing mĭn, hlak mblang lu hĭn. Khădah phung nai mtô đru lu mơh ƀiădah kâo ăt mđing uêñ kyua anei jing klei bi lông yuôm bhăn bi mklă êdei anăp”

Ară anei, dŭm sang hră ti alŭ wăl čar Dak Lak dôk mŭt hlăm wưng hriăm mbŏ kơ phung hđeh adŭ 12. Phung nai dôk mđing mđĭ klei thâo săng, bi hriăm phung hđeh klei thâo ngă klei bi lông pral, djŏ hluê si klei mrâo mơ̆ng akŏ klei bi lông, đru kơ phung hđeh mprăp kluôm ênŭm mŭt hlăm klei bi lông.

Nguyễn Thị Xuân Hương, Khua sang hră gưl tlâo Lê Quý Đôn, ƀuôn prŏng Ƀuôn Ama Thuôt brei thâo: Sang hră mkŏ mjing leh dŭm gưl bi lông čiăng tĭng dlăng, kah mbha phung hđeh hluê hnơ̆ng thâo, mkŏ mjing klei bi lông hluê êpul, kñăm bi hrŏ klei kpĭ lehanăn mđĭ boh tŭ dưn hdră mtô bi hriăm. Mrâo anei, phung hđeh nao leh hlăm dŭm klei bi lông mprăp kơ gưl bi lông hriăm jih gưl tlâo thŭn 2025 mâo knơ̆ng bruă sang hră mơar mkŏ mjing. Anei jing klei găl čiăng phung hđeh bi mưng hŏng akŏ klei bi lông hluê hdră mrâo.

“Klei bi lông anei kñăm tĭng dlăng boh tŭ klei bi lông ăt msĕ mơh boh tŭ hdră mtô bi hriăm ti sang hră čiăng kơ sang hră mâo klei hlak mblang, mkra mlih lehanăn gĭt gai bruă mtô bi hriăm ti sang hră, čiăng kơ djŏ guôp hĭn, dưi mâo mta kñăm mơ̆ng akŏ thŭn anăn jing sa thŭn hriăm mđing truh kơ mta kñăm mâo 100% ênoh hđeh dưi hlăm klei bi lông hriăm jih gưl tlâo, mơ̆ng anăn phung hđeh srăng mâo klei găl dưi hriăm ti sang hră phung hđeh mâo klei čang hmăng”.

Ti dŭm sang hră krĭng taih kbưi, krĭng knông lăn – anôk mâo lu phung hđeh mnuih djuê ƀiă, hdră mtô bi hriăm dưi hluê ngă djŏ guôp, pral djŏ hŏng klei găl mâo sĭt. Nguyễn Phan Anh, Kơiăng khua Sang hră gưl tlâo Lăk, kdriêk Lăk, čar Dak Lak brei thâo, hlăm wưng ară anei, êngao kơ bruă bi kjăp klei thâo, phung nai lŏ mđing mjing boh kdrŭt, mđĭ ai phung hđeh. Hluê anăn, sang hră srăng ksiêm dlăng, kah mbha hnơ̆ng thâo phung hđeh čiăng čih mkra hdră kčah mtô bi hriăm, đru kơ phung hđeh mŭt hlăm klei bi lông.

 “Leh klei bi lông mprăp kơ gưl bi lông klă klơ̆ng, phung hđeh srăng dưi hriăm ,bŏ 4 hruê kăm dơ̆ng. Tĭng mơ̆ng hruê 20/5 truh kơ hruê 20/6 jih jang phung hđeh ka kjăp srăng mkŏ mjing hdră hriăm mbŏ 4 hruê kăm dơ̆ng ti sang hră.

Klei bi lông hriăm jih gưl 3 thŭn 2025, čar Dak Lak mâo giăm 22 êbâo čô hđeh bi mklă nao bi lông. Đỗ Tường Hiệp, Kơiăng khua knơ̆ng bruă sang hră mơar mtô bi hriăm čar Dak Lak brei thâo, knơ̆ng bruă gĭt gai leh anôk bruă mtô bi hriăm tĭng dlăng hnơ̆ng tŭ jăk hdră bi lông thŭn êlâo, mprăp mta phŭn, hră mơar lehanăn hdră kčah hriăm mbŏ djŏ guôp hŏng grăp êpul êya. Boh nik leh Asăp mtrŭn mrô 29 mơ̆ng Phŭn bruă Sang hră mơar mtô bi hriăm dưi tŭ ba yua, dŭm sang hră mâo leh hdră mprăp mtô bi hriăm mbŏ kñăm ba wĭt boh tŭ dưn. Đỗ Tường Hiệp mñă, anôk bruă mtô bi hriăm mtă kơ dŭm sang hră bi mklă phung hđeh dleh dlan čiăng mâo hdră đru, amâo lui hlei pô phung hđeh amâo nao hlăm klei bi lông.

 “Gĭt gai sang hră čih mkra hdră kčah lŏ mtô bi hriăm mbŏ djŏ guôp hŏng klei găl mâo mơ̆ng sang hră lehanăn phung hđeh. Leh Asăp mtrŭn mrô 29 dưi ba yua, brei mâo hdră kčah kah mbha êpul phung nai đru kơ phung hđeh hriăm mbŏ klei thâo săng. Boh nik, phung hđeh ti dŭm krĭng taih kbưi, krĭng mnuih djuê ƀiă mâo hdră đru hlăm ai tiê, klei mĭn, kơ klei tui ksiêm hriăm wăt kơ mnơ̆ng dhơ̆ng čiăng phung hđeh mâo klei găl dưi hriăm mbŏ lehanăn bi lông jăk hĭn.

Mprăp klă klơ̆ng, tĭng dlăng klă klei thâo mơ̆ng grăp čô hđeh hriăm hră lehanăn čih mkra hdră kčah bi hriăm mbŏ djŏ guôp, anôk bruă sang hră mơar mtô bi hriăm čar Dak Lak dôk gĭr rơ̆ng kơ hdră bi lông jih gưl tlâo thŭn 2025 amâo djŏ knŏng ba wĭt boh tŭ dưn hlăm hdră hriăm ƀiădah lŏ mđĭ klei đăo knang kơ phung hđeh mŭt hlăm klei bi lông lu klei lông dlăng ƀiădah ăt mâo lu klei găl ti anăp./.