Pral ngă jăk bruă ksiêm dlăng ktuê dlăng klei čhĭ mnia pui kmlă, hlăm 9 mlan thŭn 2024, pui kmlă Dak Lak msir mgaih giăm 920 klei ngă soh kơ pui kmlă hŏng ênoh prăk hrui mă 1,7 êklai prăk. Thŭn dih, Dak Lak ăt dôk mrô hŏng dŭm anôk bruă hlăm Knơ̆ng bruă pui kmlă Kwar Krah (EVNCPC) kơ ênoh prăk hrui mă mơ̆ng hnơ̆ng yua pui kmlă hŏng êbeh 2,1 êklai prăk. Čiăng kơ bruă ksiêm dlăng ktuê dlăng tŭ dưn, dŭm anôk bruă pui kmlă hlăm čar ba yua leh lu hdră msir djŏ guôp hŏng boh sĭt grăp alŭ wăl.

Dŭm anôk bruă prŏng, mâo hnơ̆ng yua êa krih lu msĕ si Ea Kar, Ƀuôn Hồ, Čư̆ M’Gar… khăng mâo klei tlĕ yua pui kmlă lu hĭn hŏng dŭm krĭng wăl mkăn. Kyua anăn, hlăm yan adiê mđiă hlơr, wưng kƀĭn krih êa kơ ana pla mjing lu, dŭm anôk bruă pui kmlă mđĭ bruă ksiêm dlăng jih hruê mlam, ktuê dlăng kjăp bruă yua pui kmlă, yua kdrăp mrâo čiăng pral thâo ƀuh klei mâo… Mbĭt anăn, pui kmlă Dak Lak ăt ngă bruă ksiêm dlăng mjêč kơ bruă mnia blei leh anăn phung yua pui, kdrăp ksiêm yap, hmao thâo ƀuh, msir mgaih klei amâo jăk ngă luč liê pui kmlă, luč êđăp ênang.