Anei jing klei mgač hlăm bruă đru kčĕ, hưn mdah bruă mă, dưi bi êdah hlăm klei kƀĭn trông ksiêm wĭt bruă anei, mơ̆ng knơ̆ng bruă mnuih mă bruă, kahan êka êkeh leh anăn yang ƀuôn čar Dak Lak mkŏ mjing tlam mbruê 16/12. Hluê si klei hưn hlăm klei kƀĭn trông, thŭn 2022, kluôm čar dưi mgaih msir bruă mă kơ hlăm brô 41.250 čô, knar hŏng 103,12% mkă hŏng hdră kčah leh anăn 1.472 čô dưi nao mă bruă ti ala tač êngao, knar hŏng 106% hdră kčah thŭn.

Tĭng mkă phung nao mă bruă ti ala tač êngao hluê si klei kuôl kă wưng thŭn 2018 – 2022 jing 5.372 čô. Nguyễn Văn Cường, Khua kiă kriê anôk bruă hưn mdah bruă mă čar Dak Lak brei thâo, khădah tŭ klei hmăi mơ̆ng klei ruă tưp Covid-19, čar dưi pŏk lhe êbeh 80 gưl hưn mdah bruă mă, jing thŭn mâo hnơ̆ng ngă bruă lu hĭn mơ̆ng êlâo truh kơ ară anei.