Ti krĭng knông lăn čar Dak Lak, k’iăng Khua Knŭk kna Mai Văn Chính  mâo leh asăp mtrŭn mphŭn rŭ mdơ̆ng dŭm sang hră Knŭk kna rông ba mlir gưl hriăm gưl 1 leh anăn gưl 2 Ia Rvê. Hdră dưi rŭ mdơ̆ng ti ênhă êbeh 5ha, hŏng ênoh duh bi liê êbeh 185 êklai prăk.

Să Ia Rvê jing alŭ wăl bi knông hŏng Campuchia, klei hdĭp mnuih ƀuôn sang adôk lu klei dleh dlan. Êlan nao sang hră mơ̆ng phung hđeh ti krĭng knông lăn kbưi, bruă mkŏ mkra jing mnơ̆ng êjai. Kyuanăn, phung hđeh sang hră jing phung hơ̆k mơak hĭn êjai sang hră dưi rŭ mdơ̆ng. Adei Lang Thị Yến Vy, hđeh sang hră adŭ 7, sang hră gưl dua Nguyễn Thị Định, brei thâo:

“Êjai thâo sang hră dưi rŭ mdơ̆ng mrâo, kâo ƀuh hơ̆k mơak êdi, hmăng hmưi mâo sang hră hnưm rŭ mdơ̆ng čiăng hriăm jăk hĭn.

Bi hŏng Vi Xuân Thủy ti ƀuôn hgŭm Ia Rvê brei thâo, mnuih ƀuôn sang mâo klei hơ̆k mơak leh anăn hơĭt hlăm klei hriăm hră mơar mơ̆ng phung anak êjai mâo sang hră mlir gưl hriăm, anôk huă yang hruê kdrưh kơăm.

“Jih jang phung amĭ ama leh anăn mnuih ƀuôn sang hlăm să hơ̆k mơak êdi. Hmei lač jăk kơ Knŭk kna uên mĭn rŭ mdơ̆ng sang hră mrâo, čiăng kơ phung hđeh mâo klei găl hriăm jăk hĭn. Mâo sang hră jăk, hmei ăt mâo klei hơĭt êjai brei phung anak nao sang hră mơar.”

Ti Gia Lai K’iăng Khua knŭk kna Hồ Quốc Dũng nao hlăm knăm kơrŭ wĭt Hdră bruă rŭ mdơ̆ng sang hră knŭk kna rông ba mlir gưl sang hră gưl sa leh anăn gưl dua ti 7 să knông lăn mâo Ia Mơ, Ia Púch, Ia Pnôn, Ia Nan, Ia Dom, Ia Chia và Ia O, Ênoh bi liê kơ 7 boh sang hră jing  êbeh 1.500 êklai prăk. Dŭm hdră bruă srăng mjing tur knơ̆ng hriăm hơĭt kjăp kơ êbeh 7000 čô hđeh sang hră krĭng knông lăn Gia Lai, lu jing hđeh sang hră mnuih djiê ƀiă. K’iăng Khua knŭk kna Hồ Quốc Dũng mñă klă: hdră bruă jing yuôm bhăn hŏng krĭng knông lăn, đru mđĭ kyar mnuih mă bruă, mkra mđĭ êpul bi hgŭm leh anăn răng mgang klei êđăp ênang lĭng kahan.

“Êngao kơ hdră êlan, klei đru, Bruă sang čư̆ êa alŭ wăl, phung nai, phung amŏ ama hđeh sang hră mâo bruă klam mtrŭt mjhar phung hđeh nao sang hră mơar. Phung hđeh mâo klei hơĭt hriăm ti sang hră mrâo čiăng kơ diñu amâo kbiă sang hră. Anăn ăt jing mta kñăm tal êlâo mơ̆ng Phŭn bruă kđi čar hlăm klei bi klă mrô 81, đru mtô mjuăt ai dưi ti krĭng knông lăn lăn čar. Phung hđeh êdei dih lŏ wĭt rŭ mdơ̆ng ƀuôn sang, răng mgang knông lăn, krơ̆ng kjăp klei êđăp ênang ti alŭ wăl”.

Hmư̆ klei gĭt gai mơ̆ng k’iăng Khua Knŭk kna, k’iăng khua bruă Đảng čar, khua Bruă sang čư̆ êa čar Gia Lai Phạm Anh Tuấn ƀuăn ngă hdră hŏng klei gĭr leh anăn  ngă bruă ktang phĭt, tŭ dưn. Čar ăt rơ̆ng mâo djăp phung nai mtô, bruă mkŏ mkra čiăng êdi, bi leh bruă anei djŏ hdră kčah.

“Khua gĭt gai dŭm anôk bruă djŏ tuôm bi klă anei jing hdră êlan ngă bruă yuôm, čiăng ngă hŏng klei mjêč, kjăp, tŭ dưn, mprăp dŭm klei găl kơ êpul phung nai mtô, bruă mkŏ mkra čiăng êdi msĕ si êlan klông, êa jua, dăng kông, pui kmlă… Mjêč bi leh dŭm hdră êlan, klei đru hŏng phung nai, phung hđeh sang hră, čiăng kơ dŭm sang hră djăp klei găl ngă bruă mơ̆ng akŏ thŭn hriăm 2026 - 2027”./.