Hlăm klei bi kƀĭn, phung bi ala bi trông leh anăn bi tŭ ư hră mơar kơ klei bhiăn mă bruă, mbha bruă klam klă klơ̆ng kơ grăp čô leh anăn mkŏ mjing 4 Êpul mă bruă, kñăm rơ̆ng bruă gĭt gai kluôm leh anăn tŭ dưn hlăm hdră mprăp kơ klei ruah khua. Cao Thị Hòa An,  Khua Knơ̆ng bruă ruah khua čar Dak Lak lač klă, bruă msir klei jhat yan adiê ngă dôk lu snăk. Khădah snăn, hnơ̆ng bruă mă brei ngă hlăm klei mprăp ruah khua ăt lu mơh, djŏ tuôm kơ lu anôk bruă leh anăn alŭ wăl. Kyua anăn, hŏng keh hruê mmông knŏng adôk êbeh 3 mlan, dŭm gưl, dhar bruă brei kƀĭn jih hnơ̆ng, pral bi hgŭm kjăp pŏk ngă bruă klam djŏ hnơ̆ng djŏ hdră bhiăn.

Tlam mbruê, Dhar bruă ruah khua čar Gia Lai kƀĭn gưl tal 1. Gưl kƀĭn ngă klei bi trông, bi klă dŭm hră mơar mơ̆ng dhar bruă ruah khua čar, hâo hưn mbha bruă klam kơ 37 čô, brei klei blŭ mguôp kơ ênoh, phung nao hgŭm hlăm dŭm êpul bruă mơ̆ng dhar bruă ruah khua čar, hdră êlan hluê ngă bruă ruah phung bi ala Bruă Kbĭn ala gưl 16 leh anăn phung bi ala Êpul gơ̆ng bruă ƀuôn sang dŭm gưl wưng thŭn 2026 - 2031.