Adei Bùi Trần Diễm Quỳnh dôk hriăm ti adŭ 9A1, sang hră gưl dua Trần Quang Diệu, să Hoà Thuận, ƀuôn prŏng Ƀuôn Ama Thuôt. Adei brei thâo, êlan mơ̆ng sang nao truh ti sang hră mâo boh taih 2km, ti êlan dơ̆ng Hồ Chí Minh (êlan dơ̆ng mrô 14). Đĭ êdeh êran hŏng pil nao sang hră, adei mâo nanao klei mĭn rơ̆ng kơ klei êđăp ênang: “Mơ̆ng sang kâo truh kơ sang hră lu jing đĭ ti êlan dơ̆ng lu mnuih. Kâo đĭ êdeh êran hŏng pil nao sang hră mâo hŏng anei giăm 4 thŭn, êjai đĭ êdeh ti êlan ăt ngă djŏ hŏng klei bhiăn êlan klông, đua đuôn mgang kŏ, nao djŏ êlan, amâo mâo đĭ hmar, blă soh…Leh truh ti sang hră srăng ktuê dlăng, rơ̆ng kơ klei khuăt hlăm sang dưm êdeh, dăp êdeh djŏ pruê̆, leh truh mmông wĭt ăt ngă msĕ sơnăn mơh.”

Sang hră gưl dua Trần Quang Diệu, să Hoà Thuận, ƀuôn prŏng Ƀuôn Ama Thuôt, dôk ti djiêu êlan dơ̆ng Hồ Chí Minh, kbưi hŏng sang mnia Đạt Lý ka mâo ôh 200 met. Dua nah êlan mâo lu sang čhĭ mnia, kyuanăn lu thŭn hŏng anei sĭt truh mmông lu mnuih ti ƀăng jang sang hră kreh mâo klei kpăk đuôm, luč klei êđăp ênang hlăm êlan klông. Nai Nguyễn Văn Dũng, khua kiă kriê sang hră brei thâo, sang hră ngă leh lu hdră êlan hrăm mbĭt čiăng rơ̆ng klei êđăp ênang hlăm êlan klông kơ 1.400 čô hđeh sang hră, boh nik jing ti ƀăng jang sang hră. “Hlăm jih jang mmông kkuh kơ hla čhiăm gru akŏ hruê kăm, sang hră mâo leh dŭm klei hriăm ti gŭ hla čhiăm gru hŏng klei hlăp ngă mgưt čiăng hâo hưn kơ phung hđeh sang hră hluê ngă djŏ klei bhiăn hlăm êlan klông. Êngao kơnăn, sang hră ăt tiŏ nao êpul mnah hrah bi mguôp hŏng phung nai ngă bruă mbha pruê̆ hđeh sang hră ti ƀăng jang êjai mmông wĭt leh anăn mtô kơ hđeh sang hră găn êlan êđăp ênang, mbĭt anăn sang hră ăt mâo ƀăng jang điêt nah tluôn srăng pŏk ƀăng ti mmông hđeh sang hră wĭt čiăng bi hrŏ ƀiă klei kpăk đuôm.”

Trung tá Nguyễn Trọng Nghĩa – k’iăng khua adŭ bruă kahan ksiêm êlan klông čar Dak Lak brei thâo, čiăng răng mgang klei êđăp êang ti dŭm ƀăng jang sang hră ktuê êlan dơ̆ng, hlăm wưng êgao, anôk bruă kreh tiŏ nao êpul ngă bruă ti lu bĭt ƀăng jang sang hră čiăng mbha grông, bi hluh êlan hlăm mmông lu mnuih, mbĭt anăn ƀuah mkra ktang phĭt dŭm čô hđeh sang hră ngă soh hŏng klei bhiăn êlan klông msĕ si đĭ êdeh kơ dlông 50cc êjai ka truh thŭn, amâo mâo đua đuôn mgang kŏ, amâo mâo hră djă êdeh, mdiăng êgao ênoh mnuih, ƀuah mkra phung amĭ ama jao êdeh kơ hđeh ka truh thŭn, bi mguôp hŏng dŭm sang hdră mkŏ mjing klei bi hmô ƀăng jang sang hră êđăp ênang… Trung tá Nguyễn Trọng Nghĩa lač: “Čiăng rơ̆ng kơ klei êđăp ênang hlăm êlan klông ti dŭm sang hră, adŭ bruă kahan ksiêm êlan klông čar Dak Lak bi mguôp leh hŏng dŭm sang hră ktuê êlan dơ̆ng mrô 14, mrô 26 leh anăn 27 mbĭt hŏng kahan ksiêm dŭm să, hâo hưn kơ phung hđeh sang hră, amĭ ama, phung nao ngă djŏ klei bhiăn hlăm êlan klông, ngă bruă mbha hră, pano, ap phích, mkŏ mjing klei bi hmô ƀăng jang sang hră jăk, êđăp ênang. Hmei bi klă nanao bruă klam jing jêñ jêñ hĭn, ktang phĭt hĭn.”

Čar Dak Lak ară anei mâo giăm 490.000 čô hđeh sang hră mơ̆ng hđeh điêt truh kơ gưl 3, hluê hriăm ti 1.006 sang hră. Hlăm anăn lu sang hră ti ktuê êlan dơ̆ng mrô 14, mrô 26, 27 leh anăn dŭm êlan dơ̆ng čar, mbĭt hŏng lu bĭt êlan hlăm kdriêk, wăl krah leh anăn ƀuôn prŏng Ƀuôn Ama Thuôt, alŭ wăl mâo lu êdeh êdâo găn êrô mâo klei hŭi hyưt luč klei êđăp ênang hlăm êlan klông. Phạm Đăng Khoa, khua kiă kriê knơ̆ng bruă mtô mjuăt bi hriăm čar Dak Lak brei thâo, hlăm wưng êgao, khădah dhar bruă djŏ tuôm, dŭm sang hră ngă jăk bruă mtô hưn klei bhiăn hlăm êlan klông kơ phung hđeh sang hră leh anăn amĭ ama, ƀiădah klei hluê ngă mơ̆ng sa kdrêč phung hđeh leh anăn phung amĭ ama ăt ka mâo ôh. Klei mtŭk mtŭl, luč klei êđăp ênang êlan klông ti dŭm ƀăng jang sang hră ăt mâo nanao, boh nik jing mmông hđeh wĭt. Čiăng bư̆ mkra boh klei anei, knơ̆ng bruă bi mguôp hŏng dhar bruă djŏ tuôm hâo hưn kơ phung amĭ ama, kơ hđeh sang hră leh anăn mnuih ƀuôn sang mđĭ hĭn bruă hluê ngă djŏ klei bhiăn hlăm êlan klông, êjai nao atăt, drông anak srăng ngă djŏ klei ktrâo lač mơ̆ng êpul êya ngă bruă, phung ngă bruă, pŏk mlar klei bi hmô ƀăng jang sang hră êđăp ênang. “Čiăng răng mgang klei êđăp ênang hlăm êlan klông hŏng phung hđeh sang hră, phung amĭ ama leh anăn phung nai, knơ̆ng bruă mâo leh lu hră mtrŭn mtô kơ dŭm sang hră mâo hdră êlan mbruă čiăng răng mgang klei êđăp ênang hlăm êlan klông, boh nik jing mmông mâo mnuih lu êjai phung hđeh nao sang hră leh anăn wĭt. Dŭm sang hră ti dŭm kdriêk, wăl krah, ƀuôn prŏng ăt bi mguôp kjăp hŏng kahan ksiêm êlan klông čiăng hâo hưn, mtô mblang klei bhiăn êlan klông čiăng kơ phung hđeh thâo klă êjai kbiă hlăm êlan klông dưi êđăp ênang.”

Hŏng klei nao hgŭm hur har mơ̆ng dŭm gưl bruă, dhar bruă, klei thâo săng êjai kbiă hlăm êlan klông mơ̆ng phung amĭ ama leh anăn hđeh sang hră dưi mđĭ hĭn, boh klei kpăk đuôm, luč klei êđăp ênang hlăm êlan klông ti anăp sang hră ti čar Dak Lak hlăm mmông hđeh wĭt srăng ƀrư̆ ƀrư̆ dưi mgaih msir, đru mkŏ mjing klei bi hmô sang hră mtah, doh, siam leh anăn êđăp ênang hlăm êlan klông.