Êpul asâo Y Bruat Niê, ti ƀuôn Ea Phê, să Ea Phê, kdriêk Krông Pač rông êbeh 3 thŭn leh ƀiădah ka tuôm tlŏ ôh vaccin mkhư̆ klei ruă khŏ. Ñu brei thâo mta phŭn kyua phưi sui leh, ñu huĭ asâo kĕ tơdah mă:

“Sui leh amâo mâo tlŏ, ñu jhŏng snăk anăn pô amâo jhŏng mă ôh. Pô mă ñu kĕ mtam leh anăn amâo dưi lŏ tlŏ. Kyua huĭ hyưt jing asâo kĕ mâo mta jhat, tơdah amâo nao sang êa drao snăn djiê mtam.

 Hmư̆ hưn hlăm loa bi kčăi asăp ti să kơ hruê tlŏ mkhư̆ klei ruă khŏ kơ asâo miêi, gŏ sang ayŏng Ngô Quốc Đạt, ti să Ea Kuăng, kdriêk Krông Pač, čar Dak Lak dăp leh bruă mă čiăng dôk ti sang guôn knuă druh nao tlŏ mgang kơ 3 drei hlăm gŏ sang. Ñu brei thâo, ti nei lu gŏ sang ƀiă êdi rông sa drei asâo, miêu, ƀiădah amâo čŏng ba mnơ̆ng rông nao tlŏ mgang ôh, ƀiădah khăng dôk guôn mâo gưl tlŏ mgang mơ̆ng knŭk kna:

“Klei ruă anei thâo sơăi jing huĭ hyưt, kơ klei tlŏ mgang klei ruă khŏ anei snăn jăk mơh, ƀiădah tơdah bruă mdrao mgŭn wĭt tlŏ ti sang kâo srăng tlŏ. Tơdah mâo êa drao tlŏ jăk mơh, pô tlŏ kơ ñu, tơdah mâo klei amâo jăk dưi ƀiă mơh”

             Kdriêk Krông Pač mâo êbeh 10 êbâo gŏ êsei rông asâo hŏng ênoh êbeh 15 êbâo drei. Khădah snăn thŭn 2022 bruă rông mnơ̆ng knŏng pŏk ngă tlŏ mgang kơ 3.800 drei. Hlue si Võ Văn Vàng – Anôk bruă rông mnơ̆ng leh anăn mdrao kơ mnơ̆ng rông kdriêk Krông Pač, dleh dlan jing kƀah klei bi hgŭm mơ̆ng phung rông asâo:

“Yuôm bhăn hĭn jing ară anei brei thâo săng. Klă sĭt thâo săng kơh bruă tlŏ mgang klei ruă khŏ ñu jăk. Khădah snăn ară anei mnuih ƀuôn sang ăt adôk ngă ngơi mang hŏng bruă tlŏ mgang anei. Lu mnuih ƀuôn sang mâo bruă ngă amâo đei jăk ôh hŏng phung nao tlŏ mgang, si tôhmô đa lač, asâo yơh anăn, mă leh anăn tlŏ yơh”.

 Hlue si klei ksiêm yap mơ̆ng Knơ̆ng bruă lŏ hma leh anăn mđĭ kyar krĭng ƀuôn sang, mơ̆ng thŭn 2018 truh 2022, Dak Lak mâo 25 čô djiê kyua klei ruă khŏ. Hlăm anăn, mâo phung mâo klei ruă sui leh, mơ̆ng 4 mlan truh 1 thŭn êdei kơ mâo klei ruă. Jih jang phung djiê jing amâo nao tlŏ mgang ôh leh asâo miêu kĕ.

            Wăt tơdah grăp thŭn mâo nanao phung djiê kyua klei ruă khŏ, ƀiădah bruă tlŏ vaccin mkhư̆ klei ruă khŏ kơ mnơ̆ng rông ti Dak Lak knŏng êbeh 30% hlăm ênoh 360 êbâo asâo, miêO. Ară anei Dak Lak dôk ngă hdră tlŏ mgang vaccin klei ruă khŏ kơ asâo miêu hlăm kluôm čar mơ̆ng 25/3-25/4. Hlue anăn, dŭm gŏ êsei mnuih djuê ƀiă, gŏ sang knŭk kna dlăng ba, gŏ êsei ƀun srăng amâo mă prăk ôh. Phung mkăn srăng bi liê tlŏ mgang jing 22.100 prăk/1 aruăt./.