Blŭ hrăm hlăm knăm mphŭn rŭ mdơ̆ng sang hră gưl sa Cẩm Thạch, Khua Knŭk kna Phạm Minh Chính lač anei jing hdră mâo boh tŭ dưn, bi klă hdră êlan mơ̆ng Đảng leh anăn Knŭk kna bi êdah klei uêñ mĭn, klei gĭr mơ̆ng čar Thanh Hóa leh anăn klei sa mơ̆ng êpul êya anôk bruă duh mkra  hlăm bruă kriê dlăng bruă mtô mjuăt bi hriăm, đru mguôp mkŏ mjing klei mlih mđĭ hnơ̆ng tŭ jăk bruă sang hră mơar mơ̆ng alŭ wăl. Khua Knŭk kna mñă brei kñăm bi leh bruă rŭ mdơ̆ng sang hră êlâo kơ hruê 31/8/2026.

Mñă ktang hlăm wưng kơ anăp, hŏng klei mĭn mđĭ kyar bruă duh mkra nao mbĭt hŏng ngă klei đĭ kyar, klei mtăp mđơr yang ƀuôn, bi hrŏ ƀun leh anăn mđĭ hnơ̆ng jăk klei hdĭp ai tiê mnuih ƀuôn sang, grăp boh tŭ dưn đĭ kyar mđing truh kơ klei đru kơ mnuih ƀuôn sang, Khua Knŭk kna mñă brei hluê ngă hdră mtrŭn klei kƀĭn prŏng tal 14 mơ̆ng Đảng, Hdră mtrŭn klei kƀĭn bruă Đảng čar Thanh Hóa wưng thŭn 2025 - 2030.