Jing sa hlăm phung hđeh êdam êra hur har nao êlâo, dưn yua klei bi hmô mkra mjing mrâo, ayŏng Y Luật Niê, mnuih djuê ana Êđê, ti ƀuôn Mghĭ, să Yang Mao, kdriêk Krông Bông, čar Dak Lak ară anei dôk mđĭ kyar klei bi hmô pla lu mta ana, rông lu mta mnơ̆ng. Ti ênhă 2ha lăn gŏ sang, ayŏng pla pluă lu mta ana msĕ si ana săm đrao, kphê, durian, tei nan leh anăn klei êbeh 100 m2 ênao êa čiăng rông abao. Ayŏng lŏ bi mguôp hŏng bruă čhĭ ana mjeh, blei kphê mtah čiăng mđĭ hnư hrui wĭt. Y- Luật brei thâo: jing đang viên mda asei, hriê kơ prŏng mơ̆ng bruă đoàn, bruă êpul ti alŭ wăl, ñu mâo nao klei hur har ksiêm hriăm, dưn yua dŭm klei bi hmô mrâo, bi êdah ai tiê nao êlâo, bi hmô phung sa čô đảng viên.

Kâo pô jing sa čô đảng viên mda asei mâo nanao klei mĭn hlăm akŏ jing đảng viên nao êlâo, mnuih ƀuôn sang nao êdei. Kâo pô ăt nao čuă dlăng lu klei bi hmô hlăm leh anăn êngao čar, mơ̆ng anăn wĭt dưn yua hlăm đang pla mjing pô, ƀuh ti dŏ mâo boh tŭ dưn srăng hâo hưn kơ mnuih ƀuôn sang hluê ngă.

            Ăt msĕ hŏng Y-Luật, wưng leh êgao, lu phung hđeh êdam êra ti să Yang Mao đĭ hriê mơ̆ng bruă đoàn, bruă êpul dưi nao hgŭm hlăm dŭm alŭ hriăm kơ Đảng leh anăn phung kdlưn hĭn dưi ksiêm dlăng bi mŭt hlăm Đảng. Hlăm 7 thŭn êgao, bruă Đảng să bi mŭt leh giăm 90 čô đảng viên mrâo, hnơ̆ng mđĭ kyar đảng viên grăp thŭn mâo klei hĭn mkă hŏng hdră kčah. Truh kơ ară anei, să Yang Mao mâo giăm 300 čô đảng viên dôk ngă bruă ti 18 alŭ ƀuôn leh anăn dŭm anôk bruă, êpul êya.

Trần Thế Thành, Khua bruă Đảng să Yang Mao brei thâo, klei dleh dlan hlăm bruă mđĭ kyar đảng viên ti alŭ wăl jing duah mnuih čiăng mtô mjuăt leh anăn bi mŭt đảng. Kyua lu phung kdlưn hĭn kreh nao mă bruă kbưi, dleh dlan hlăm bruă bi klă phŭn agha. Siamdah, dŭm anôk bruă Đảng mâo leh klei mtrŭt mjhar, bi mguôp hŏng dŭm êpul êya mkăn čiăng hmao ƀuh, đru, mtô bi hriăm čiăng mjŭt mjing, mđĭ kyar đảng viên hlăm grăp anôk bruă.

Pluă mbĭt hŏng dŭm hdră bruă “Hđeh êdam êra čô kơ bruă, phung mda asei răng mgang ala čar”, mtrŭt mjhar kơ phung hđeh êđam êra mkŏ mjing dŭm klei bi hmô bruă duh mkra leh anăn mtrŭt mjhar phung hđeh êdam êra ngă bruă ăt msĕ hŏng nao hgŭm hlăm dŭm hdră bruă hlăm alŭ wăl, mơ̆ng anăn mkŏ mjing ai dưi, boh kdrŭt kơ phung ayŏng adei mđĭ kyar klei hdĭp mda, nao hgŭm hlăm bruă Đảng, hdră bruă ti dŭm alŭ ƀuôn. Mta yuôm bhăn hĭn srăng mkŏ mjing boh kdrŭt kơ phung dôk mâo klei hêñ mŭt Đảngm hêñ ngă bruă. Mơ̆ng ară anei mkŏ mjing dŭm êpul klei khăp čiăng, brei diñu nao čuă dlăng klei bi hmô leh anăn wĭt hluê ngă. Mơ̆ng dŭm klei bi hmô mơ̆ng phung kmeh gơ̆ng anei čiăng pŏk phai ti alŭ wăl să.

            Hluê si klei ksiêm mơ̆ng Bruă Đảng kdriêk Krông Bông, khădah alŭ wăl jing krĭng taih kbưi dleh dlan, ƀiădah să Yang Mao ăt jing gru mngač hlăm bruă mđĭ kyar đảng viên ti kdriêk Krông Bông wăt kơ hnơ̆ng tŭ jăk leh anăn ênoh. Să mâo nanao klei uêñ mĭn mđĭ kyar đảng viên jing phung mda asei, mnuih djuê ƀiă. Mbĭt anăn kñăm mđĭ hnơ̆ng tŭ jăk klei ngă bruă, ăt msĕ hŏng bruă ksiêm dlăng, ktuê dlăng hlăm êpul bruă Đảng. Mbĭt hŏng bruă klam mơ̆ng gưl bruă Đảng nah gŭ leh anăn dŭm anôk bruă Đảng, bruă klam mơ̆ng pô ba anăp jing yuôm bhăn sơnăk. Lâm Thanh Tùng, Khua êpul mkŏ mjing bruă Đảng kdriêk Krông Bông brei thâo, hŏng klei hriăm mơ̆ng lu thŭn ngă bruă Đảng, khua bruă Đảng să Yang Mao mâo leh lu hdră êlan hlăm bruă tui duah ai dưi čiăng mđĭ kyar đảng viên.

Să Yang Mao jing sa alŭ wăl krĭng taih kbưi, mâo lu mnuih ƀuôn sang jing mnuih djuê ƀiă. Mbĭt hŏng bruă mđĭ kyar đảng viên hlăm dŭm thŭn êgao tuôm hŏng klei dleh dlan, kpăk êgun. Ƀiădah, hŏng klei gĭr ktưn mơ̆ng ayŏng Thành leh anăn êpul kiă bruă Đảng, hlăm dŭm thŭn êgao, bruă Đảng să yang mao dưi ngă jăk bruă mđĭ kyar đảng viên, boh nik jing mnuih djuê ƀiă. Dŭm boh tŭ dưn anei dưi đru mguôp yuôm bhăn hlăm bruă Đảng kdriêk bi leh bruă mđĭ kyar đảng viên, boh nik ti krĭng mnuih ƀuôn sang jing mnuih djuê ƀiă.

            Mâo klei uêñ mĭn, hrăm mbĭt hŏng dŭm hdră bruă leh anăn klă anăp bi mguôp hŏng mnuih ƀuôn sang dưi đru leh kơ bruă Đảng să Yang Mao hmao ƀuh, mtô mjuăt phung êdah êdi dưi mŭt Đảng, mđĭ hnơ̆ng êpul êya đảng viên ti alŭ wăl. Êjai dôk hlăm êpul bruă Đảng, grăp čô đảng viên mâo nanao ai tiê găn hgao klei dleh dlan mđĭ kyar bruă duh mkra, nao êlâo hlăm dŭm mta bruă ti alŭ, ƀuôn. Yap yuôm bhăn ai tiê nao êlâo hlăm bruă mkŏ mkra krĭng ƀuôn sang mrâo, đru mkŏ mjing ƀuôn sang ƀrư̆ hruê ƀrư̆ đĭ kyar.