Hluê si klei hưn mơ̆ng anôk bruă hiu čhưn ênguê leh anăn sang jưh mdei Biệt Điện (ti ƀuôn prŏng Ƀuôn Ama Thuôt, čar Dak Lak), mơ̆ng hruê 10/2, anôk bruă klă klơ̆ng mjưh mdei klei đĭ êman ti wăl hiu čhưn ênguê kƀan yuôl Ƀuôn Đon ti să Krông Ana, kdriêk Ƀuôn Đon. Hrô kơnăn jing dŭm mta mnơ̆ng dhơ̆ng hiu čhưn ênguê boh hŏng knhuah dha kreh alŭ wăl nao mbĭt hŏng lu bruă hiu čhưn ênguê jăk găl hŏng êman msĕ si, brei êman đuê̆ hiu, hlăp lêñ hŏng phung tuê. Bruă ngă anei knăm bi êdah hdră êlan mrâo mơ̆ng čar Dak Lak kơ bruă mjưh mdei kleoi đĭ êman hlăm bruă hiu čhưn ênguê čiăng răng kriê phung êman mơ̆ng čar, mlih ƀrư̆ ƀrư̆ jing klei bi hmô bruă hiu čhưn ênguê jăk găl hŏng êman.

Ăt djŏ tuôm hŏng hdră anei, Hlăm hdră Knăm mơak êman Ƀuôn Đon – jing sa hlăm dŭm mta bruă phŭn mơ̆ng knăm mơak kphê Ƀuôn Ama Thuôt gưl tal 8, thŭn 2023, mkŏ mjing ti mlan 3 kơ anăp ti čar Dak Lak, amâo lŏ srăng mâo ôh dŭm hdră msĕ si: êman bi lông êran, bi lông luê êa, êman bi lông čưng boh, bi lông ktŭng klei hŏng mnuih. Hrô kơnăn srăng mâo dŭm mta bruă: Ngă yang akâo klei suaih pral kơ êman, brei êman ƀơ̆ng buffet, bi msiam kơ êman, êman bi lông kkuh kơ phung tuê, brei êman hlăp leh anăn mă rup hŏng phung tuê…Vũ Minh Thoại, khua adŭ bruă Dhar kreh – klei haoa hưn kdriêk Ƀuôn Đon brei thâo:

        Băng: “Boh klei anei ăt hluê ngă klei ƀuăn rơ̆ng mơ̆ng bruă sang čư êa hŏng Êpul bruă hlô mnơ̆ng Asi. Anei jing hdră êlan leh anăn ai tiê jăk. Hmei ăt hmăng hmưi, kyuadah ară anei čiăng mâo dŭm drei êman đru kơ bruă hiu čhưn ênguê jing ngăn dŏ yuôm bhăn êdi leh. Kyuanăn hlăm klei găl anăn, amâo mâo djŏ knŏng hjăn pô êman ƀiădah wăt kơ hmei ăt hmăng hmưi kriê dlăng jăk, ngă jăk mta phŭn anei. Hmei ăt hmăng hmưi phung tuê hriê ti Ƀuôn Đon knŏng hriê dlăng êman đuč, amâo mâo lŏ đĭ êman ôh, leh anăn pô srăng dưi djă pioh dŭm drei êman ktang sui ktang jăk. Ai tiê mơ̆ng kdriêk leh anăn jing jang mnuih ƀuôn sang ăt bi tŭ ư msĕ sơnăn đuč”.

Hdră êlan anei mơ̆ng dhar bruă djŏ tuôm leh anăn bruă sang čư êa alŭ wăl mâo phung tuê sa ai. Nguyễn Xuân Thủy, sa čô tuê hiu čhưn ênguê ti čar Vĩnh Phúc lu blư̆ hriê ti Ƀuôn Đon hiu čhưn ênguê lač, rup êman tinei nao mbĭt leh hŏng klei hing ang Ƀuôn Đon hlăm lu thŭn êgao leh anăn mâo phung tuê hlăm leh anăn êngao ala čar thâo lu. Khădah sơnăn, ƀiădah hluê si ñu, đĭ êman nao jŭm dar wăl hiu čhưn ênguê leh anăn găn krông Sêrêpôk amâo lŏ jăk găl ôh, mlih dŭm mta hiu čhưn ênguê mkăn jing jăk hĭn.

Băng: "Drei srăng lui hĕ bruă hiu čhưn ênguê đĭ êman kyua dah jing huĭ hyưt êdi, 3 – 4 đĭ ti rŏng êman leh anăn hiu jŭm dar bhiâo riâo rit kăn lŏ jăk mơh. Gŏ sang kâo tuôm nao čhưn ênguê ti Thailand. Ti nei ƀuh diñu ngă bruă hiu čhưn ênguê jăk êdi. Mnuih Thailand krư̆ êman hlă sa wăl mâo mnư̆ gang, mkŏ mjing klei čưng boh kơ êman, bi lông êran maraton, ngă xiếc…buh jăk êdi. Phung anak kâo dôk ti siă mnư̆ ruêh êman, mă mtei brei êman ƀơ̆ng ăt jăk mơh…”

Amai Hà Nhi Phương Thảo, sa čô tuê hiu čhưn ênguê hriê mơ̆ng ƀuôn prŏng Hồ Chí Minh hriê ti Ƀuôn Đon brei thâo, ară anei êman ti čar Dak Lak mâo klei hrŏ hmar kyua ka dưi mđai. Bruă mă yua klei hiu čhưn ênguê đĭ êman srăng ngă kơ êman luč djuê hmar hĭn. Dhar bruă hiu čhưn ênguê alŭ wăl srăng mlih dŭm tour hiu chưn ênguê djŏ tuôm hŏng êman ƀu srăng jăk hĭn.

Băng: "Hluê si kâo mĭn, srăng mkŏ mjing klei hiu čhưn ênguê djŏ tuôm hŏng êman, amâo djŏ ôh klei đĭ êman. Sitôhmô mkŏ mjing dŭm tour ksiêm duah gru jơ̆ng êman ti Ƀuôn Đôn, mkŏ mjing dŭm tour mă rup, bi mnei leh anăn kriê dlăng kơ êman, ngă nanao klei đĭ êman srăng hmăi kơ klei suiah pral êman, leh anăn êman srăng luč djuê”.

Lŏ hdơr, mâo hŏng anei 2 thŭn, sa čô tuê hiu mơ̆ng kdriêk Khoái Châu, čar Hưng Yên nao hlăm tuor hiu čhưn ênguê đĭ êman ti wăl hiu čhưn ênguê Ƀuôn Đon, ƀiădah amâo mâo myun êman kplŏng bi lĕ truh kơ klei êka kjham nao dŏng mdrao ti sang êa drao. Leh mâo klei anăn, pô bi ala Knơ̆ng bruă Biệt Điện mâo klei hưn brei mdei dŭm tour hiu čhưn ênguê đĭ êman.

Mrâo anei, Êpul gơ̆ng bruă ƀuôn sang čar Dak Lak bi klă leh hdră mtrŭn kơ hdră đru kơ êman mđai. Hluê anăn, ngăn prăk alŭ wăl srăng đru 500 êbâo prăk kơ sa cô pô êman ana hlăm sa hruê leh anăn 600 êbâo prăk kơ sa čô pô êman knô hlăm sa hruê, hlăm wưng 30 hruê êman dôk mbĭt. Tơdah êman kđông êđai, pô êman srăng lŏ mâo klei đru 300 prăk hlăm sa hruê hlăm wang 10 mlan, 600 êbâo prăk mơ̆ng mlan 11 truh kơ êman mđai.