Hlăm thŭn 2023, Anôk bruă pui kmlă Dak Lak msir mghaih leh êbeh 30 km êlan klei kaphâo hưn êlan kbưi ti dŭm krĭng hlăm kdriêk Krông Pač, Ƀuôn Đon, Čư̆ Kuiñ, Krông Ana, Êa Sup, Krông Bông, Lăk lehanăn Čư̆ Mgar. Lŏ dơ̆ng mđĭ bruă ksiêm dlăng êlan kap hâo hưn êlan kbưi, boh nik msir mghaih anôk huĭ luič klei êđăp ênang, ba klei amâo jăk hlăm êlan pui kmlă. Anôk bruă pui kmlă Dak Lak mkŏ mjing leh êpul Zalo “Anôk bruă nah gŭ” hŏng êbeh 50 čô hgŭm mâo phung khua kiă kriê anôk bruă pui kmlă, phung khua 6 anôk bruă hâo hưn êlan kbưi, mnuih mă bruă kriê dlăng, ba yua êlan klei pui, êlan klei kap.

Grăp hruê, êpul tŭ mă klei hâo hưn, mă rup mâo mta định vị tọa độ tơdah mâo klei truh amâo jăk ti êlan klei kap ti gơ̆ng pui, tŭ ư hruê mmông nao msir mghaih lehanăn bi mklă klei kap anei mơ̆ng hlei êpul bruă mơ̆ng anăn mâo hdră msir mghaih, hrui mă klei. Khădah mrâo mkŏ mjing ƀiădah êpul Zalo “Anôk bruă nah gŭ” đru msir mghaih leh pral, bi hrŏ klei khăp čhuai klei kap hmăi truh kơ êlan mạng internet. Hlăm wưng ti anăp, PC Dak Lak srăng krơ̆ng kjăp êpul Zalo lehanăn pŏk mlar thiăm mnuih hgŭm mơ̆ng Knơ̆ng bruă hâo hưn mtô mblang, Adŭ bruă duh mkra, anôk bruă nah gŭ dŭm kdriêk, ƀuôn prŏng, wăl krah, Anôk bruă mtrang mngač ƀuôn prŏng, ana kyâo mtah… čiăng msir mghaih bruă anei jăk găl hĭn. Klei anei kñăm mđĭ klei bi hgŭm mơ̆ng dŭm anôk bruă rơ̆ng bruă bi msiam ƀuôn prŏng, msir mghaih klei mtŭk mtŭl klei kap hâo hưn êlan kbưi, khăt ana kyâo mtâo… amâo hmăi truh kơ bruă mkăp pui kmlă, êlan mạng…/.