Êpul gơ̆ng bruă ƀuôn sang čar Dak Lak bi mklă Hdră mtrŭn kơ klei mkŏ mjing mrâo 6 knơ̆ng bruă mâo: Knơ̆ng bruă kriê dlăng bruă knuă, Knơ̆ng bruă Ngăn Prăk, Knơ̆ng bruă lŏ hma leh anăn Wăl hdĭp mda, Knơ̆ng bruă rŭ mdơ̆ng, Knơ̆ng bruă kreh knhâo leh anăn Kdrăp mrâo, Knơ̆ng bruă djuê ana leh anăn Klei đăo, mbĭt anăn mjưh ruê̆ bruă ngă mơ̆ng Knơ̆ng bruă hŏng tač êngao. Leh mkŏ dăp, čar Dak Lak mâo 13 anôk bruă thơ̆ng hlăm Knơ̆ng bruă sang čư̆ êa čar.

Êpul gơ̆ng bruă ƀuôn sang čar Dak Lak ăt bi mklă Hdră mtrŭn mjưh ruĕ ngă bruă mơ̆ng Anôk bruă djuê ana (mơ̆ng Êpul gơ̆ng bruă ƀuôn sang čar). Leh dăp, Êpul gơ̆ng bruă ƀuôn sang čar Dak Lak mâo 3 Anôk bruă: Anôk bruă duh mkra- Ngăn prăk; Anôk bruă Hdră bhiăn; Anôk bruă Dhar kreh- ala ƀuôn. Ăt hlăm klei bi kƀĭn anei, Êpul gơ̆ng bruă ƀuôn sang čar Dak Lak bi mklă Hdră mtrŭn mkra mlih, mbŏ dŭm hnơ̆ng kčah, bruă klam mđĭ kyar bruă duh mkra ala ƀuôn thŭn 2025 hŏng klei kñăm đĭ kyar mâo 8% kơ dlông.