Să knông lăn Ia Lôp dưi mkŏ mjing mơ̆ng thŭn 2006 hluê si hdră êlan mbĕ mđuê̆ mnuih ƀuôn sang mđĭ kyar bruă duh mkra mrâo mơ̆ng Binh đoàn 16 – Phŭn bruă lĭng kahan, ară anei jing Êpul bruă duh mkra lĭng kahan mrô 737, Wăl kahan 5, ênoh mnuih ƀuôn sang hlăm să ară anei hlăm brô 6.600 čô, hŏng 15 djuê ana hdĭp mda. Hlăm dŭm thŭn êgao, să Ia Lôp bi mguôp kjăp hŏng dŭm anôk bruă, dhar bruă, êpul êya ngă bruă klam ti alŭ wăl, boh nik jing kđông kahan knông lăn 735, Êpul bruă duh mkra lĭng kahan 737 leh anăn kahan ksiêm kdriêk Ea Sup ngă jăk bruă rơ̆ng klei êđăp êan, jih jang mnuih ƀuôn sang răng mgang klei dưi kiă kriê ala čar, răng mgang klei êđăp ênang knông lăn.

Hlăm “Hruê knăm jih jang mnuih ƀuôn sang răng mgang knông lăn”,  ti să Ia Lôp mkŏ mjing leh dŭm mta bruă tŭ dưn msĕ si: mkŏ mjing klei mkă dlăng klei ruă, mbah êa drao amâo mâo mă bruă, kriê dlăng klei suiah pral kơ 500 čô mnuih ƀuôn sang, mđup brei 1 boh sang “Anôk dôk mđao krĭng knông lăn”, mđup brei 10 boh êdeh wai jơ̆ng kơ phung hđeh sang hră mâo klei hdĭp dleh dlan, giăm 30 hnư mnơ̆ng kơ phung khua bruă Đảng, phung mâo kơhưm, phung êdah êdi hlăm hdră jih jang mnuih ƀuôn sang nao hgŭm răng mgang klei dưi kiă kriê ala čar, klei êđăp ênang knông lăn ala čar.