Aguah 26/2, ti ƀuôn prŏng Ƀuôn Ama Thuôt, Anôk mkŏ mjing Knăm mơak kphê Ƀuôn Ama Thuôt tal 9 thŭn 2025, lŏ dơ̆ng kƀĭn hŏng phung čih klei mrâo kơ bruă anei. Anei jing klei bi kƀĭn bruă klei mrâo tal 3 leh dua blư̆ mkŏ mjing ti ƀuôn prŏng Hồ Chí Minh leh anăn Hà Nội. Thŭn anei, knăm mơak srăng mâo 17 bruă ngă klă sĭt ehh anăn mâo lu klei mdê hŏng dŭm hdră bruă srăng dưi rŭ mkra čiăng kkuh drông 50 thŭn mtlaih êngiê Ƀuôn Ama Thuôt, msĕ si Knăm mphŭn rŭ mkra Sang mkra mjing kphê Trung Nguyên Legend; Knăm mphŭn rŭ mkra Hdră bruă Anôk bruă mnia blei - sang jưh - Sang dôk ti ƀuôn prŏng Ƀuôn Ama Thuôt; knăm mphŭn rŭ mkra Hdră bruă bi liê rŭ mdơ̆ng Wăl tuh tia mkra mjing Phú Xuân. Knăm mơak kphê Ƀuôn Ama Thuôt tal 9 thŭn 2025 hŏng akŏ “Ƀuôn Ama Thuôt - Anôk truh mơ̆ng kphê dlông rŏng lăn”, srăng mkŏ mjing mơ̆ng hruê 09- 13/3/2025.

Nguyễn Tuấn Hà, K’iăng Khua Knơ̆ng bruă sang čư̆ êa čar Dak Lak, Khua anôk mkŏ mjing Knăm mơak brei thâo, anei ăt srăng jing klei mđĭ kyar bruă mnia blei yuôm bhăn; jing klei găl kơ phung kriê dlăng, anôk bruă duh mkra leh anăn ƀĭng găp dlông rŏng lăn bi tuôm, bi hgŭm mnia blei, hưn mdah anăn knăl kphê Ƀuôn Ama Thuôt, mđĭ kyar hiu čhưn ênguê leh anăn mkŏ mnia blei.