50 thŭn leh hruê mtaih êngiê, mơ̆ng sa wăl krah bi blah, leh 50 thŭn Ƀuôn Ama Thuôt, čar Dak Lak kpưn đĭ jing krĭng pla mjing kphê mơ̆ng Việt Nam, bŏ hŏng ênai čing drông phung tuê hriê hlăm knăm mơak kphê. Anei ăt jing sa krĭng knơ̆ng bruă duh mkra, hdră mnêč bruă lŏ hma mơ̆ng Lăn Dap Kngư. 50 thŭn êlâo, klei bi blah mtaih êngiê Ƀuôn Ama Thuôt jing mphŭn kơ yan mnga tŭ dưi, Ƀuôn Ama Thuôt ară anei jăk siam jing boh tŭ dưn mâo klei êđăp ênang, êngiê leh anăn hluh hlir. Mơ̆ng anei, ƀuôn prŏng kčưm hŏng hdră mrâo, hdră đĭ kyar leh anăn ñŭ kma, jing anôk truh mơ̆ng kphê tar rŏng lăn.

Êlâo kơnăn, Klei rang mdah rup Êa Mil bi kƀĭn dưi mphŭn pŏk ti ƀuôn prŏng Ƀuôn Ama Thuôt, mbĭt hŏng klei hơ̆k kdơ̆k mơ̆ng dŭm mta bruă hlăm knăm mơak kphê Ƀuôn Ama Thuôt tal 9 dôk mkŏ mjing ti Dak Lak. Mkŏ mjing mơ̆ng ară anei truh jih hruê 15/3 kơ anăp, klei rang mdah “Êa mil bi kƀĭn” mdưm kwang mnga ti war mnga Ƀuôn Ama Thuôt, ktuê êlan dơ̆ng phŭn truh kơ dŭm anôk mkŏ mjing hdră bruă knăm mơak kphê Ƀuôn Ama Thuôt, rang mdah 150 pŏk rup êdah êdi mơ̆ng phung mă rup ti 5 čar Dak Lak, Dak Nông, Gia Lai, Hải Dương leh anăn Phú yên.

Dŭm pŏk rup bi êdah dŭm anôk siam, hing ang, êdah êdi leh anăn knhuah gru dhar kreh phŭn mơ̆ng grăp krĭng kwar. Anei ăt jing hdră tŭ dưn bi hdơr 50 thŭn hruê mblah dưi Ƀuôn Ama Thuôt, mtaih êngiê Dak Lak, đru bi lu jơr hlăm hdră Knăm mơak kphê Ƀuôn Ama Thuôt tal 9, thŭn 2025.