Mơ̆ng hruê 1/7, mƀt hŏng kluôm ala, čar Dak Lak klă sĭt mphŭn ba yua gru hmô bruă sang čư̆ êa  alŭ wăl dua gưl. Jih jang 102 să, ƀuôn hgŭm hlăm čar Dak Lak gĭr ba yua kdrăp mrâo, mđĭ mlih mrô hlăm klei msir mgaih hră mơar. Mnuih ƀuôn sang nao ti anôk bruă knŭk kna să, ƀuôn hgŭm lu jing čiăng ngă hră mơar čiăng êdi msĕ si: hră mơar gŏ êsei, čih anăn kkiêng, hưn pô djiê, hră ênua mdrao mgŭn, bi mklă hră mơar, hră mơar lăn ala, mŭt hriăm… 

Phung knuă druh, phung mă bruă knŭk kna ti anôk bruă pral mưng hŏng kdrăp yua mbĭt kluôm čar. Boh nik, bruă Dang Kông Dak Lak jao leh kơ phung thơ̆ng kơ kdrăp mrô leh anăn phung mă bruă nao đru ba yua hdră bruă mrô knŭk kna. Dŭm klei gĭr hrăm mbĭt anei đru mjing klei găl jih hnơ̆ng kơ mnuih ƀuôn sang tơdah nao msir mgaih hră mơar knŭk kna.