Ksiêm dlăng ti dŭm sang mnia ti ƀuôn prŏng Ƀuôn Ama Thuôt msĕ si sang mnia Tân An, sang mnia phŭn ti Ƀuôn Ama Thuôt, ai êwa blei mnơ̆ng mprăp kơ Têt mphŭn kdrăm kơah. Boh nik bruă tă kčoh, jep čŭt, hdruôm jơ̆ng. Dŭm anôk čhĭ ƀêñ, keŏ ăt mâo lu mta. Amai Lê Thị Diễm Huyền, pô čhĭ mnia čhum ao ti Sang mnia Ƀuôn Ama Thuôt brei thâo, wưng anei ai blei đĭ leh, ƀiădah ñu ăt răng tơdah mă mnơ̆ng pioh čhĭ” “Thŭn anei ăt kăm pioh ƀiă mnơ̆ng siam, thŭn anei Noel hŏng Têt bi giăm đei anăn phung čhĭ mnơ̆ng ăt răng mơh. Boh klei čhĭ mnia thŭn anei snăn ăt ƀiă mơh anăn amâo yuôm ôh.”

Hlue si amai Nguyễn Thị Nga, ti ƀuôn hgŭm Tân Hòa, ƀuôn prŏng Ƀuôn Ama Thuôt, dŭm anôk bruă čhĭ mnia răng mă mnơ̆ng pioh čhĭ djŏ guôp hŏng boh sĭt. Kyua msĕ si gŏ sang ñu, wăt tơdah ƀuh sang Mnia lu jơr mnơ̆ng dhơ̆ng, ƀiădah ñu amâo blei lu msĕ si grăp thŭn ôh: “Kâo ƀuh mnơ̆ng dhơ̆ng thŭn anei djăp ênŭm dŭm mta mnơ̆ng dhơ̆ng, ênoh ênil snăn đĭ hĭn thŭn dih ƀiă. Hjăn kâo snăn blei mnơ̆ng dhơ̆ng čiăng êdi, bi mnơ̆ng mtah snăn truh giăm Têt kâo knŏng mprăp kơ dŭm hruê 30, 1 Têt, bi hruê 2,3,4,5 snăn jih jang sang mnia čhĭ leh djăp ênŭm anăn gŏ sang kâo amâo mkăm pioh ôh.”

Ti sang mnia Co.opmart Buôn Ama Thuôt, ară anei mnơ̆ng pioh kơ Têt mâo leh lu, hlăm anăn ênoh mnơ̆ng dhơ̆ng Việt Nam mâo 95%. Trần Thị Thành Nhân,  K’iăng Khua sang mnia brei thâo, thŭn anei, êngao kơ ngă hdră bi hơĭt ênoh ênil, sang mnia mâo lu hdră đru mdul dôk ba yua mơ̆ng ară anei truh Têt. “Anôk bruă mâo leh hdră kčah mkăm pioh mnơ̆ng dhơ̆ng hŏng hnơ̆ng đĭ hĭn mkă hŏng thŭn dih jing 15%, anôk bruă ăt bi hgŭm hŏng anôk mkăp mâo hdră kčah mkra mjing leh anăn mđĭ mnơ̆ng dhơ̆ng mkăm pioh čiăng kơ phŭn mkăp mâo djăp ênŭm leh anăn lu jơr. Sang mnia Coop Mart ƀuăn rơ̆ng ênoh hơĭt leh anăn ƀiă hĭn mkă hŏng anôk ba čhĭ mơ̆ng 5 truh 10% mbĭt anăn mâo thiăm lu hdră đru mdul kơ ênoh mnơ̆ng dhơ̆ng čiăng mđĭ thiăm klei dưi kơ phung blei yua.”

Dak Lak ară anei mâo 148 boh sang mnia, 1 sang mnia phŭn, 8 anôk mnia blei leh anăn êbeh 60 boh sang čhĭ mnơ̆ng dhơ̆ng đ’điêt. Hlue si Lưu Văn Khôi, Khua knơ̆ng bruă tuh tia mnia blei čar Dak Lak, phŭn mnơ̆ng dhơ̆ng mkăp Têt thŭn anei đĭ hlăm brô 56% mkă hŏng thŭn dih. “Knơ̆ng bruă tuh tia mnia blei hmei mă leh bruă hŏng dŭm anôk bruă mkra mjing mnia blei, dŭm hdră mkăp, sang mnia, Anôk bruă duh mkra mnia blei čiăng mtă kơ dŭm anôk bruă anei mđĭ bruă mkra mjing mnia blei mnơ̆ng dhơ̆ng leh anăn mâo hdră kčah mă mnơ̆ng dhơ̆ng mkăm pioh čiăng rơ̆ng mkăp kơ phung yua hlăm gưl knhal jih thŭn ăt msĕ mơh gưl Tết Nguyên đán Quý Mão 2023.”

Čar Dak Lak mâo êbeh 1 êklăk 8 êtuh êbâo čô mnuih. Anôk bruă djŏ tuôm đăo knăl klei čiăng yua hlăm mlan tết srăng đĭ 20% mkă hŏng yang đar. Kyua anăn, Knơ̆ng bruă sang čư̆ êa čar Dak Lak pioh êbeh 1.510 êklai prăk čiăng mkăn pioh mnơ̆ng dhơ̆ng čiăng êdi. Êpul mnơ̆ng dhơ̆ng mâo čar Dak Lak bi mklă brei hơĭt ênoh mnơ̆ng dhơ̆ng leh anăn mkăm pioh jing mnơ̆ng dhơ̆ng, mnơ̆ng ƀơ̆ng (čĭm ŭn, čĭm mnŭ, boh bip, boh mnŭ, êa prăi, ƀêñ hra leh anăn dŭm mta boh kroh, djam tam), êa pui êwa čuh. Ară anei mâo 10 anôk bruă duh mkra prŏng mkŏ mjing hdră kčah mprăp mnơ̆ng dhơ̆ng yua hŏng hlăm brô êbeh 420 êklai prăk.

Mơ̆ng ară anei truh êlâo leh anăn êdei Tết Nguyên đán Quý Mão 2022, êpul bruă djŏ tuôm čar Dak lak srăng hyuă kjăp klei ksiêm dlăng, ktuê dlăng anôk ba čhĭ čiăng hmao thâo ƀuh, msir bi jăk klei ngă soh msĕ si mkăm lu đei mnơ̆ng, mnia blei mnơ̆ng kăm, soh hŏng hdră bhiăn, amâo klă phŭn agha, mrô, mplư mplêč hlăm bruă mnia blei…

Khua gĭt gai Knơ̆ng bruă kriê dlăng anôk ba čhĭ čar Dak Lak brei thâo, dôk pŏk ngă hdră kčah gang mkhư̆ klei mnia blei mnơ̆ng soh hŏng hdră bhiăn leh anăn mnơ̆ng mgưt dŭm mlan knhal jih thŭn 2022 wăt gưl êlâo leh anăn êdei Tết Nguyên đán Quý Mão. Êngao anăn, êpul kriê dlăng anôk ba čhĭ ksiêm dlăng êbeh 70 anôk bruă mâo, dŭm anôk mkăm mnơ̆ng dhơ̆ng, dŭm anôk bruă mnia blei, sang mnia phŭn, wăt phung mâo bruă mnia blei hlăm hla pŏk web ala ƀuôn… kñăm msir mgaih bi jăk klei ngă soh hdră bhiăn kơ mnia blei, bi mjhua wưng knhal jih thŭn, giăm Tết mđĭ ênoh amâo djŏ.