Hluê si hdră tă đĭ kyar, wưng thŭn 2026 – 2030, Dak Lak mdưm mta kñăm đĭ kyar kah knar 11 – 15,5% hlăm sa thŭn, kluôm GRDP 5 thŭn mĭn tĭng mâo giăm 700 êbâo êklai prăk. Hdră kčah grăp thŭn dôk ti ênoh 2 mrô, mơ̆ng 10,2% thŭn 2026 đĭ 12% hlăm thŭn 2030. Dŭm boh kdrŭt đĭ kyar dưi bi klă mâo bruă lŏ hma đĭ kyar hơĭt kjăp, bruă tuh tia jing bruă kdlưn hĭn, bi mkŏ mkra mâo bruă klam anôk lĕ klei đĭ kyar êjai lu hdră prŏng dưi ngă. Ƀiădah, wưng tlâo mlan tal 1/2026, klei đĭ kyar GRDP knŏng mâo mă hlăm brô 7,5%, ƀiă hĭn mkă hŏng hdră kčah. Dŭm alŭ wăl boh kdrŭt đĭ knŏng ƀiă, hlăm anăn bruă mkŏ mkra knŏng mâo mă 3,5%. Ênoh kƀah kơ lu bruă mkăn, bruă mkŏ mkra leh anăn bruă tuh tia. Ênoh duh bi liê kluôm yang ƀuon hrŏ mkă hŏng wưng anei thŭn dih. Hlăk mblang phŭn agha, Cao Đình Huy, khua knơ̆ng bruă mkŏ mkra čar Dak Lak lač, dŭm anôk kpăk hlăm ruh mgaih anôk ala leh anăn klei ngă bruă hmăi klă sĭt kơ klei đĭ kyar:

 “Klei kpăk hlăm klei ngă bruă ăt msĕ mơh brei čan duh bi liê mơ̆ng klei mkŏ mkra jing klei ruh mgaih anôk ala jing êmưt, tal 2 anăn jing ai dưi mơ̆ng dŭm anôk ngă bruă ară anei. Hlăm klei ksiêm dlăng đa đa hdră ară anei dŭm anôk bruă ăt ngă bruă êmưt, mñă kơ phung duh bi liê srăng ktang phĭt, mtrŭt mjhar leh anăn srăng ƀuah mkra hŏng dŭm anôk bruă ngă bruă êmưt.”

Bi hŏng bruă tuh tia, klei čuăn jing hnưm ruh mgaih klei păk dŭm hdră pui kmlă leh anăn bi kluôm bruă mkŏ mkra, anôk bruă tuh tia čiăng mâo mta kñăm đĭ kyar êbeh 13% hlăm wưng kơ anăp. Aduôn Nguyễn Thị Thu An, Khua knơ̆ng bruă tuh tia brei thâo, khădah hdră ruh mgaih mphŭn ngă leh, ƀiădah bruă hluê ngă ăt adôk êmưt kyua kƀah klei mtô klă klơ̆ng:

“Hdră mtrŭn mrô 253 – 254 mơ̆ng Bruă kƀĭn ala  mrâo ba mdah ruh mgaih leh bruă hluê ngă dŭm hdră pui kmlă doh, boh nik ti krĭng dleh dlan. Khădah hdră pŏk leh ƀiădah dŭm hdră êlan leh anăn dŭm klei čuăn klă klơ̆ng hlăm dŭm hdră mtrŭn truh kơ ară anei ka dưi ba mdah, kyuanăn dŭm dhar bruă ăt mâo klei ngĭ ngơ̆ hlăm klei ngă bruă.”

Bi êdah hdră ngă bruă gĭt gai kơ grăp dhar bruă, grăp wưng tlâo mlan, čiăng ksiêm dlăng klei đĭ kyar, Đào Mỹ, k’iăng khua Bruă sang čư̆ êa čar Dak Lak lač, čiăng tĭng mkă bruă klam klă klơ̆ng:

 “Hdră ngă bruă klă hĭn,čiăng bi klă hluê si grăp thŭn, grăp dhar bruă. Hlăm kluôm mnơ̆ng dhơ̆ng 698 êbâo êklai prăk anei čiăng mkăp kơ thŭn 2026 dŭm ênoh, mơ̆ng anăn mbha kơ dhar bruă sitôhmô dŭm, bruă tuh tia dŭm, mnia mblei dŭm, leh anăn mbha kơ wưng tlâo mmlan dŭm, mơ̆ng añăn bi klă kơ bruă lŏ hma, mnơ̆ng hlăm dliê si ngă, kan hdang si ngă leh anăn grăp dhar bruă ya hdră mâo, mnơ̆ng dhơ̆ng ya dŏ bi klă bruă klam hlăm klei gĭt gai.”

Ti anăp klei čuăn đĭ kyar 2 ênoh mrô hlăm wưng lu boh krŭt adôk êmưt, Lương Nguyên Minh Triết,  khua bruă Đảng čar Dak Lak mñă srăng mâo hdră êlan kdlưn hĭn, boh nik hlăm klei mlih mrâo hră mơar knŭk kna leh anăn iêo jak duh bi liê hdră êlan. Mbĭt anăn čiăng mkŏ mjing hdră tă mđing tal êlâo, bi hrŏ mmông ngă dŭm hdră êlan prŏng, mkŏ mjing klei đĭ kyar mơ̆ng thŭn 2026.

         “Kñăm msir ktang phĭ klei mlih mrâo hră mơar knŭk kna, bi hơĭt wăl duh bi liê, bi hrŏ mmông ngă hră mơar knŭk kna dlăng anei jing hdră êlan mâo knhuah kdlưn hĭn hlăm wưng đĭ kyar ară anei mơ̆ng čar. Čar mkŏ mjing hdră êlan mtah kơ dŭm hdră mđing tal êlâo leh anăn hdră iêo jak dŭm klei duh bi liê hdră êlan.”