Hrue mă bruă tal êlâo klei bi kƀĭn tal sa, Bruă kƀĭn ala gưl 16, aguah mbrue 6/4, bruă kƀĭn ala ngă leh klei ruah khua bruă kƀĭn ala gưl 16, wưng păn bruă thŭn 2026-2031. Khua bruă kƀĭn ala gưl 15 Trần Thanh Mẫn mâo bruă kƀĭn ala lŏ ruah jing khua bruă kƀĭn ala gưl 16. Hdră mtrŭn kơ klei ruah  Trần Thanh Mẫn păn ngă khua bruă kƀĭn ala, mâo leh phung bi ala tŭ ư hŏng ênoh 491/491 ênoh phung bi ala nao ti anôk bi kƀĭn.

Leh blŭ đĭ păn bruă, Khua bruă kƀĭn ala Trần Thanh Mẫn bi mni lač jăk kơ mnuih ƀuôn sang ƀuôn prŏng Hồ Chí Minh đăo knang ruah ñu jing pô bi ala bruă kƀĭn ala gưl 16; phung bi ala bruă kƀĭn ala đăo knang kơ ñu lŏ păn ngă khua bruă kƀĭn ala gưl  16; ñu lač, anei jing klei myun prŏng, lehanăn jing bruă klam prŏng mơh mơ̆ng Đảng, Knŭk kna lehanăn mnuih ƀuôn sang kluôm ala đăo knang. Khua bruă kƀĭn ala Trần Thanh Mẫn ƀuăn myơr jih ai tiê pô mă bruă kơ lăn čar, kơ mnuih ƀuôn sang, mbĭt hŏng bruă kƀĭn ala, hŏng dhar bruă gĭt gai bruă kƀĭn ala, dŭm anôk bruă kƀĭn ala, lehanăn jih jang phung bi ala bruă kƀĭn ala lŏ dơ̆ng mlih mrâo, ba yua klei kreh knhâo, mlih mrâo hŏng klei knhêč, bruă kƀĭn ala mrô, klei thâo mĭn anak mnuih, mđĭ boh tŭ bruă knuă, blŭ nao mđrĭng hŏng bruă ngă, ngă mtam, ngă djŏ, tŭ jing lehanăn jih hnơ̆ng./.