Mơ̆ng akŏ thŭn hlue ngă hdră mtô bi hriăm gưl tlâo 2018, Dak Lak jing sa hlăm dŭm čar hmăi kjham kyua kyua klei ruă Covid-19.  Lu hlăm wưng anăn, hđeh sang hră hriăm online. Kyua anăn, hlăm thŭn kơ anăp, dŭm ang hră luč lu mmông čiăng lŏ dlăng wĭt klei thâo kơ phung hđeh, mbĭt hŏng bruă mbruă mkŏ mjing hdră kčah mtô leh anăn hriăm bi djŏ guôp hŏng hdră mtô bi hriăm hđeh sang hră mrâo. Phạm Xuân Mỹ, Khua sang hră gưl 2 knŭk kna rông ba Krông Pač brei thâo:

 “Djŏ tuôm kơ bruă phŭn jing brei mkŏ mjing klei hriăm bi hmô, bruă anei sang hră gĭt gai leh dŭm êpul thơ̆ng kơ bruă bi trông ruah klei nbai mtô bi hmô dŭm klei hriăm mơ̆ng hdruôm hră dôk yua mtô ară anei amâodah dŭm hră mơar mtô mrâo”.

 Sa hlăm dŭm klei mtă tơdah pŏk ngă hdră mtô bi hriăm mrâo jing mkŏ mjing hriăm aguah/tlam glăm sa hruê, boh nik hŏng gư; hđeh. Khădah snăn, lu alŭ wăl hlăm čar Dak Lak ătb adôk kƀah sang hră, adŭ, kdrăp mtô bi hiăm ka hrăm mbĭt hlue si klei mtă. Nai Hoàng Thị Cúc, ti sang hră gưl sa Trần Quốc Toản, wăl krah Ea Pôč, kdriêk Čư̆ Mgar brei thâo:

 “Hlăm klei hriăm mjuăt mâo kdrăp djăp ênŭm kơ phung nai mtô, bi tinei phung nai amâo mâo ôh. Phung nai knŏng mtô mung mang, dlăng hlăm hdruôm hră čiăng brei hđeh sang hră dlăng hlăm anăn. Kyua anăn sa mmông hriăm snăn 3-4 boh hră hđeh sang hră amâo thâo hdơr ôh”

Êngao anăn, klei kƀah nai mtô lu ăt jing klei dôk bi kgăn hŏng bruă sang hră Dak Lak. Bruă mtô dŭm klei hriăm bi mguôp hrô kơ sa klei hriăm msĕ si êlâo dih, ăt ngă kơ phung nai mtŭl mtŭk mơh, boh nik, hđeh sang hră hlăm gưl 2. Phạm Ngọc Lĩnh, Khua sang hră gưl 2 Ea Tu, să Ea Tu, ƀuôn prŏng Ƀuôn Ama Thuôt, čar Dak Lak brei thâo:

 “Êpul nai mtô dôk kƀah hlăm sang hră, kyua anăn 1 hlăm ênoh klei hriăm adôk dleh dlan. Tal dua, dŭm klei hriăm msĕ si kơ klei kreh knhâo snăn ară anei ka mâo ôh nai mtô thơ̆ng ƀiădah brei mâo 3 čô nai mtô jing nai mtô

Hoá học, hƀuê ênuk, kơ mnơ̆ng dhơ̆ng hdĭp ăt msĕ mơh klei mtô kơ hƀuê ênuk lăn ala snăn ară anei ka mâo ôh nai mtô hjăn ƀiădah mâi dua čô nai mtô amâodah nai mtô hƀuê ênuk mtô kơ lăbn ala amâodah nai mtô kơ lăn ala mtô hƀuê ênuk”.

Hlue si Knơ̆ng bruă sang hră mtô bi hriăm čar Dak Lak, ară anei, kluôm čar adôk 1.200 čô nai, mnuih mă bruă hlue si hdră kčah, ênoh adŭ hriăm čiăng mkŏ mjing mrâo ngă djŏ klei čiăng hriăm aguah tlam/hruê jing giăm 500 adŭ.  Dŭm klei kƀah anei hmăi leh lu kơ hnơ̆ng ăt msĕ mơh hnơ̆ng hlue ngă hdră mtô bi hruăm sang hră thŭhn 2018 mơ̆ng čar. Dŭm boh sang hră čŏng mkŏ mjing klei hriăm leh anăn tui hluê si boh sĭt êlâo kơ čar dưi msir mgaih kơ kdrăp mnơ̆ng mtô bi hriăm, nai mtô./.