Ktuê dlăng nanao klei hưn djŏ tuôm hŏng hdră êlan bi mŭt leh anăn khuăt mnuih mă bruă, đảng viên Nguyễn Văn Lập, ti să Hoà Thắng, ƀuôn prŏng Ƀuôn Ama Thuôt ƀuh anei jing sa hdră êlan prŏng. Asei ñu pô leh anăn mnuih ƀuôn sang đăo knang, klei mlih anei srăng pŏk êdei anăp đĭ kyar kơ lăn čar.

Hnơ̆ng čuăl mkă leh anăn ai dưi đĭ kyar bruă duh mkra srăng pŏk mlar hĭn, mkŏ mjing klei găl čiăng mtrŭt mđĭ dŭm klei mĭn mrâo, mnuih ƀuôn sang bi mguôp hĭn, mjĕ êrô lu hĭn, leh anăn klei hdĭp dhar kreh ăt srăng jơr hĭn.”

Hŏng aduôn Ngô Thị Minh Trinh, k’iăng khua bruă Đảng kdriêk Krông Pač, čar Dak Lak, bruă mjưh ruê̆ gưl kdriêk, ñu leh anăn êpul knuă druh, phung mă bruă knŭk kna srăng tŭ klei hmăi hŏn. Ƀiădah, bruă bi khuăt jing sa klei čiăng êdi, mâo boh tŭ dưn mbĭt kyuanăn grăp čô knuă druh, đảng viên hlăm kdriêk ăt thâo klă bruă klam pô.

 “Wưng tal êlâo ăt mâo dŭm klei ka thâo săng, klei hŭi. Ƀiădah hŏng bruă hâo hưn, bi trông, phung knuă druh, đảng viên leh anăn phung mă bruă knŭk kna ƀuh klă klei yuôm bhăn mơ̆ng hdră êlan, mơ̆ng anăn sa ai ngă kyua klei đĭ kyar mbĭt mơ̆ng lăn čar.”

Hluê hdră êlan bi mŭt mbĭt gưl să dưi bi klă hlăm klei kƀĭn trông gưl 11, Êpul khua bruă Đảng gưl dlông gưl 13, ênoh alŭ wăl gưl să srăng hrŏ hlăm brô 70%, jing srăng mâo 3 să bi mŭt jing sa. Phung knuă druh, đảng viên ti Dak Lak bi klă, klei ngă bruă srăng tuôm hŏng klei dleh dlan hlăm wưng tal êlâo, mơ̆ng klei mưng, boh taih truh kơ anôk mă bruă mrâo. Ƀiădah hŏng ai tiê nao êlâo leh anăn bruă klam mơ̆ng knuă druh, đảng viên tinei dưi mkŏ mjing ai êwa ngă hdră hŏng klei hơĭt kjăp. Aduôn Cao Thị Thúy Nga, khua dlăng bruă Đảng să Tân Lập, kdriêk Krông Ƀŭk, čar Dak Lak brei thâo:

Hmei mđĭ hĭn ênoh knuă druh wĭt kơ nah gŭ, čiăng ngă jăk hĭn bruă klam đru kơ mnuih ƀuôn sang – djŏ hŏng ai tiê “Knuă druh jing phung mă bruă kơ mnuih ƀuôn sang ”. Khădah sa blư̆ ngă lu bruă klam, ƀiădah hŏng ai tiê bruă klam, hmei bi klă nanao, adôk sa hruê mă bruă srăng mă jih ai kyua bruă mă leh anăn kyua mnuih ƀuôn sang”.

Ară anei, ti čar Dak Lak mâo 180 anôk bruă knŭk kna gưl să mâo să, ƀuôn hgŭm, wăl krah. Leh bi mŭt mbĭt mĭn tĭng adôk 45 anôk bruă- hrŏ hlăm brô 75%. Hluê si Nguyễn Hoài Dương, khua êpul bruă hâo hưn leh anăn čung ba mnuih ƀuôn sang bruă Đảng čar Dak Lak, bruă mkŏ dăp anei amâo djŏ knŏng bi khuăt mnuih mă bruă ƀiădah lŏ jing mmông găl čiăng mbha gưl, mbha klei dưi ktang hĭn kơ gưl să. Mơ̆ng anăn bruă sang čư̆ êa giăm hŏng mnuih ƀuôn sang, đru kơ mnuih ƀuôn sang jăk hĭn, tŭ dưn hĭn.

 “Hlăm wưng êgao, dŭm alŭ wăl leh anăn dhar bruă ƀrư̆ ƀrư̆ mkŏ dăp mnuih mă bruă leh anăn truh kơ ară anei dôk nao djŏ êlan. Anăp anei, hmei srăng lŏ mtrŭt mđĭ bruă bi mŭt čar, lui gưl kdriêk, bi mŭt să. Anei jing hdră êlan djŏ guôp, klă hŏng boh sĭt, đru mgaih msir dŭm klei dleh dlan ară anei leh anăn bi lar klei găl mâo mơ̆ng grăp alŭ wăl, đru mđĭ kyar bruă duh mkra ala ƀuôn nao mbĭt hŏng răng mgang klei êđăp ênang hŏng klei hơ̆ĭt kjăp.”

Bruă bi mŭt mbĭt anôk bruă knŭk kna ti čar Dak Lak amâo djŏ knŏng jing klei čiăng êdi hlăm hdră mlih mrâo, ƀiădah lŏ bi êdah klei gĭt bruă kđi čar hlăm bruă mkŏ mjing bruă knŭk kna khuăt, tŭ dưn, đru kơ mnuih ƀuôn sang jăk hĭn. Khădah ti anăp adôk mâo lu klei lông dlăng, ƀiădah hŏng klei sa ai, bruă klam mơ̆ng êpul knuă druh, đảng viên leh anăn klei sa ai mơ̆ng mnuih ƀuôn sang, čar Dak Lak dôk ƀrư̆ ƀrư̆ bi sĭt hdră êlan prŏng mơ̆ng Đảng, knŭk kna hŏng klei jăk, ktang phĭt leh anăn đăo knang. Dŭm klei gĭr hruê anei srăng jing tuê knơ̆ng kjăp kơ Dak Lak mŭt hlăm wưng đĭ kyar mrâo- hŏng klei mbruă, mrâo mrang leh anăn hơĭt kjăp hlăm êdei anăp.