Ƀri hŏng hrue knăm anei, mnuih ƀuôn sang ƀuôn Tơ̆ng Jŭ,  să Ea Kao, ƀuôn prŏng  Ƀuôn Ama Thuôt, čar Đắk Lắk hlăk jhĭt mŭat drông tue. Jing sa boh ƀuôn mnuih ƀuôn sang anak Ê Đê mơ̆ng sui leh, hlăm ƀuôn ăt adôk djă pioh lu knhuah gru djuê ana pô, msĕ si sang krum, pin êa, dŭm bruă pơ̆k mñam, krah rup… Hlăm ƀuôn ară anei mâo 18 gŏ sang čŏng bi mguôp mbĭt ngă bruă hiu čhưn ênguê, hlăm dŭm bruă drông tue hiu dlăng bruă dhar kreh, msĕ si bruă mkra kdrăp pĕ tông, knă kpiê, lông ƀơ̆ng mnơ̆ng ƀơ̆ng pô, hmư̆ klei pĕ tông… Amai H'Wân Buôn Krông, ti ƀuôn Tơ̆ng Jŭ hưn, mâo bruă hiu čhưn hlăm ƀuôn sang, lŏ đru thiăm kơ ênoh mâo ba wĭt mơ̆ng mnuih ƀuôn sang hlăm ƀuôn, lehanăn lŏ đru kơ mnuih ƀuôn sang thâo bi kriê pioh knhuah gru pô:

“Hlăm sang hmei mâo leh sang krum pô, war prŏng, lehanăn ăt čiăng bi kriê pioh knhuah gru dhar kreh msĕ si čing čhar, čeh kpiê. Leh mâo tue hriê čhưn, snăn hlăm wăl sang pô mâo leh mơh boh kroh, mâo ênao kan, lehanăn bi kưt ei rei, tông čing čhar čhưn hŏng tue. Wăt hlăm klei jưh mdei đih đăm, phung tue hlŏng dưi đih đăm jưh mdei hlăm sang krum pô”.

Kyua mđĭ lar klei găl mâo hŏng lu hdră mtrŭn yuôm bhăn, Wăl hiu čhưn ênguê lăn êa ala čar Măng Đen, kdriêk Kon Plŏng, čar Kon Tum ară anei jing leh anôk truh mơ̆ng lu phung tuê hiu čhưn ênguê truh ti Lăn dap kngư. Dŭm thŭn êgao, Kon Plŏng drông leh 1,2 êklăk čô tuê. Mơ̆ng akŏ thŭn truh kơ ară anei, phung tuê hiu čhưn ênguê đĭ pral, hlăm anăn tuê hiu čhưn ênguê ala tač êngao đĭ lu hlăm grăp hruê hruê. Mơ̆ng bruă nao hgŭm hlăm hdră hiu čhưn ênguê, dhar kreh, mnuih ƀuôn sang djuê ƀiă mâo leh klei thâo săng hĭn hlăm bruă kriê pioh, mđĭ lar knhuah dhar kreh djuê ana đưm. A Khàn, Khua bruă Đảng alŭ Tu Cần, kdriêk Kon Plŏng brei thâo, mnuih ƀuôn sang brei ngăn bruă pral hĭn, mĭn mjing mrâo lu hdră hiu čhưn mkăp kơ phung tuê hiu čhưn ênguê.

“Ară anei, ƀuôn hmei dôk mkŏ mjing hdră bi hriăm kdŏ mmuñ, tông čing, kdŏ čhuang lehanăn nao hgŭm hlăm dŭm knăm mơak. Dŭm alŭ ƀuôn bi lông ktưn kriê kjăp lehanăn mđĭ lar knhuah dhar kreh djuê ana đưm. Mnuih ƀuôn sang tinei ăt bi mlih klei mĭn, hdră ngă, boh nik tui ksiêm lehanăn mđĭ kyar bruă hiu čhưn ênguê êpul êya tŭ dưn, kñăm jak iêu ƀrư̆ hruê ƀrư̆ lu phung tuê truh ti Măng Đen, Kon Plông”.

          Hlăm hdră êlan mđĭ kyar bruă hiu čhưn ênguê, bruă knŭk kna čar Kon Tum mđing nanao kơ boh tŭ dưi mơ̆ng êpul êya mnuih djuê ƀiă. Mơ̆ng ƀuôn prŏng Kon Tum truh kơ dŭm krĭng taih kbưi msĕ si Tu Mơ Rông, Đăk Glei… boh nik kdriêk Kon Plŏng, mkŏ mjing leh lu hdră hiu čhưn ênguê tui ksiêm kơ dhar kreh, mnơ̆ng ƀơ̆ng, ngăn dŏ… jiă knhuah mnuih djuê ana Sedang, Bahnar, Jeh Triêng. Dŭm ƀuôn hiu čhưn ênguê êpul êya, msĕ si , như Kon Kơ Tu (ƀuôn prŏng Kon Tum), Tu Thó (Tu Mơ Rông), Vi Rơ Ngheo, Kon Vơng Kia, Kon Chênh (Kon Plŏng)… dôk jing klei ktưn hưn mơ̆ng êpul êya mnuih ƀuôn sang djuê ana ƀiă ti čar Kon Tum.

Đru kơ mnuih ƀuôn sang thâo bi kriê pioh, lehanăn mđĭ bi lar hĭn knhuah gru dhar kreh, dŭm thŭn êgao, čar Lâm Đồng amâo mâo mdei lŏ kơrŭ lu knăm mơak mơ̆ng djuê ana. Ară anei hlăm čar mâo leh 84 knăm knhuah gru djuê ana. Hlăm anăn dôk djă yua, lehanăn kriê pioh jing: Knăm Pơthi mơ̆ng mnuih Churu lehanăn êpulk mnuih K’ho ti kdriêk Đức Trọng; knăm huă êsei mrâo mơ̆ng djuê ana K’ho Srê, kdriêk Di Linh; knăm Bok Chu-bur mơ̆ng mnuih djuê ana Churu; knăm ngă yang mdiê mơ̆ng mnuih Mạ ti kdriêk Bảo Lâm; knăm atăt mngăt mdiê wĭt kơ hjiê; klei iêo wĭt ung, knăm Lồng Tồng mnuih Tày... Tui si khua mduôn K’Keo, ti ƀuôn Hàng Làng, să Gung Ré, kdriêk Di Linh, bruă lŏ bi kơrŭ dŭm knăm mơak anăn mâo leh klei tŭ jing yuôm bhăn:

“Anẻi jing knhuah gru dhar kreh mơ̆gn aê aduôn pô đưm, ară anei lŏ kơrŭ wĭt kñăm kriê pioh kơ anak čô êdei anăp, thâo ƀuh lehanăn thâo săng kơ dhar kreh djuê ana pô. Ti anăp klei dleh dlan mơ̆ng boh klei msĕ si ară anei, ƀiădah hŏng ai tiê thâo čiăng mnuih ƀuôn sang mâo leh klei sa ai, mâo klei bi mguôp lŏ kơrŭ wĭt dŭm knăm mơ̆ng aê aduôn hđăp. Hmei ƀuh bŏ hŏng klei mơak, jing myưng m’ang êdi tơdah dưi kriê pioh knhuah gru dhar kreh djuê ana pô”.