Klei năng mđing êdi hlăm dŭm hrue êgao jing klei bi hdơr 50 thŭn hrue kwar dhŭng mâo klei êngiê, mluh lir lăn čar hlăm hrue 30/4 ti ɃP Hồ Chí Minh. Knăm bi hdơr anei kdrăm k’ah hŏng hnơ̆ng prŏng, lehanăn mâo klei hgŭm mơ̆ng dŭm pluh êbâo čô mnuih ƀuôn sang lehanăn tue mnơ̆ng ala tač êngao. Knăm bi hdơr 50 thŭn hrue lăn čar mâo klei êngiê mâo 48 êpul kahan, hŏng giăm 13.000 čô mnuih nao ruĕ. Kahan China, kahan Lào lehanăn Campuchia hriê bi ruĕ kahan mbĭt. Hlăm knăm bi hdơr, kahan mnah truh 21 boh knong mbĭt hŏng klei muiñ kkuh hla čhiăm gru Việt Nam. Kahan êdeh phiơr mâo tiŏ nao dŭm pluh boh êdeh phiơr Dăkwăk, êdeh phiơr bi blah phiơr ruĕ dlông adiê./.

Ti ƀuôn prŏng Hồ Chí Minh mkŏ mjing leh dŭm pluh anôk mnah phao briêng mkăp kơ mnuih ƀuôn sang hlăm hruê mơak mơ̆ng lăn čar.Mlam hruê 30/4, srăng mâo lu anôk mnah phao briêng, truh 28 anôk mnah hŏng hnơ̆ng đŭt lehanăn hnơ̆ng dlông hlăm kluôm ƀuôn prŏng. Mbĭt hŏng anăn, mâo dŭm hdră rang mdah pui mngač hlăm wăl adiê hlăm mlam hruê 26/4 lehanăn 30/4 hŏng êbeh 10.000 kdrăp phiơr amâo mâo pô mgăt, mdah lu rup mâo mta phŭn jăk siam hưn lač kơ ƀuôn prŏng Hồ Chí Minh hlăm 50 thŭn êgao.

Mbĭt hŏng anăn ti ƀuôn prŏng Hồ Chí Minh mkŏ mjing lu bruă mdah klei kdŏ muiñ. Hlăm anăn mâo bruă mkŏ klei mđung rup: “Kwang nanao klei muiñ kơ klei dưi prŏng” . hdră kdŏ muiñ mâo Phŭn bruă dhar kreh, mjuăt asei mlei, lehanăn hiu čhưn ênguê mkŏ mjing, bi mguôp hŏng ƀuôn prŏng HCM mkŏ mjing leh ti dinh Thống Nhất hrue 29/4.  Mdah klei ayŭ ki bi mguôp hŏng bi mguôp hŏng klei ruĕ aseh mâo phŭn bruă kahan ksiêm kiă kriê, mkŏ mjing leh ti êlan Lê Lợi lehanăn êlan êbat jơ̆ng Nguyễn Huệ.

Ti Hà Nội, Hdră kdŏ mmuñ “Klei ƀuăn Dưr Dhŭng” srăng dưi mkŏ mjing ti tač čưng boh Ala čar Mỹ Đình, mâo klei hgŭm mơ̆ng êbeh 800 čô kdŏ mmuñ, phung kahan hđăp, phung tuôm ƀuh hƀuê ênuk. Hdră anei jing klei bi mguôp lehanăn bi mklin mơ̆ng hră mơar hƀuê ênuk, klei čih, klei yăl dliê, hdră kdŏ mmuñ ênuk mrâo mrang. Boh nik, ti hdră anei mâo 2 boh êdeh sar T54, êdeh dưi ba yua hlăm hdră kdơ̆ng mblah hŏng Mi. Ară anei klei ƀuăn rơ̆ng Dưr Dhŭng mâo leh tač hưn mdah prŏng, mâo 2 gơ̆ng bi êdah Dưr Dhŭng, ti krah mâo kban Hiền Lương. Mbĭt hŏng anăn, jing kdrăp mdah 3D mapping gưl tal êlâo mâo hlăm hdră anei.

Êlâo anăn, ti sang bi kƀĭn Thống Nhất (Knhuah gru ala čar kơ Dinh Độc Lập) mkŏ mjing hdră kưt muiñ “Lăn čar bŏ hŏng klei mơak”. Hlăm hdră mâo 3 kdrêč:  “Êpa mhao klei hluh lir”, “Êpa mhao kơ klei kpưn đĭ” lehanăn “Êpa mhao kơ klei jhŏng ktang” mâo mkŏ mjing msĕ si klei yăl dliê đưm, bi êdah klei kưt muiñ, kdŏn hlăp… lŏ bi yăl dliê kơ klei leh găn hlăm hƀuê ênuk jhŏgn krtang mơ̆ng djuê ana, mơ̆ng lăn čar bi klă kơ klei prŏng prĭn mơ̆ng klei dưi prŏng yăn mnga thŭn 1975.

Ti Hà Nội, Sang mđung asăp blŭ Việt Nam, mkŏ mjing leh Hdră kdŏ mmuñ “Kwang nanao klei mmuñ tŭ dưi kdrưh kơăm”. Hdră anei mâo 3 kdrêč: “Hà Nội hmư̆ klei hưn tŭ dưi”, “Nao phă Sài Gòn”, “Lăn čar hluh lir”.

Grăp kdrêč jing sa klei bi êdah gru kruăk kdrưh kơăm, mdah wĭt hƀuê ênuk truh kơ sa Việt Nam hruê anei mlih mrâo, ñŭ kma lehanăn đĭ kyar. Ngô Thiệu Phong, Hră klei mrâo Điện tử mơ̆ng Sang mđung asăp blŭ Việt Nam brei thâo:

“Hlăm hdră Kwang nanao klei mmuñ tŭ dưi kdrưh kơăm, hmei čiăng lŏ bi ƀrơ̆k mdih ai êwa hruê 30/4 thŭn 1975 ti Sang mđung asăp blŭ Việt Nam. Boh nik ti adŭ mă asăp mơ̆ng Sang mđung asăp blŭ Việt Nam, mnuih răk klei hâo hưn kơ hdră tŭ dưi hruê 30/4/1975. Mnuih mâo klei hâo hưn tal êlâo, mnuih ktưn hưn dưi ba klei hưn anei truh kơ mnuih ƀuôn sang kluôm ala lehanăn tar rŏng lăn, hưn mthâo sa hdră bruă prŏng mơ̆ng lăn čar jing “Việt Nam hluh lir kluôm dhuôm leh”.