Hlue ngă klei čoh čuăn mơ̆ng Phŭn bruă kđi čar, mlan 3-1975, pŏk klei ksŭng mblah, lehanăn kgŭ kdơ̆ng mơ̆ng lĭng kahan lehanăn mnuih ƀuôn sang drei yan mnga thŭn 1975 kčưm kơ klei ksŭng mblah lehanăn mâo mă klei dưi nanao. 3 kdrăn mblah ktang jing kdrăn mblah Lăn Dap kngư pŏk klei ksŭng mblah tal êlâo lehanăn mâo mă Ƀuôn Ama Thuôt, hlŏng mâo mă jih lăn dap kngư; kdrăn mblah Huế - Đà Nẵng lehanăn kdrăn mblah djă anăn Hồ Chí Minh mâo mă Sài Gòn - Gia Định.

Hlăm dŭm hrue knhal tuič mơ̆ng klei bi blah, khădah kahan roh kruh rai leh, ƀiădah diñu ăt dôk duah djăp mnêč kdê kdŭn lehanăn lŏ čiăng wĭt bi kdơ̆ng, kñăm gang mkhư̆ êlan ksŭng mblah mơ̆ng kahan pô. Hrue 26-4-1975, leh sa wưng dôk ba kahan hŏng klei pral, mbĕ kahan êjai lehanăn ksŭng mblah êjai, lehanăn lŏ mbŏ êpul kahan, 5 binh đoàn knơ̆ng mơ̆ng kahan sua mă klei êngiê mbha ngă 5 êlan ksŭng mblah hlăm krah ƀuôn prŏng Sài Gòn - Gia Định.

Truh 11h30’ hrue 30/4/1975, Khua mil čhil jing jai Dương Văn Minh lehanăn jih jang bruă sang čư̆ êa Việt Nam Cộng hòa yơr kngan yơh. Klei bi blah mâo anăn pia Hồ Chí Minh mâo klei dưi kluôm dhuôm.

Klei dưi prŏng yan mnga thŭn 1975 kruak knăl leh kơ klei čoh čuăn, ba djuê ana pô čhuang hlăm ênuk gưl mrâo “Hnŭk êngiê, mhluh lir, yang ƀuôn ngă phŭn”.  lehanăn mđĭ ai prŏng kơ klei bi blah sua wĭt klei êngiê kơ djuê ana, lehanăn klei bi blah kyua klei êđăp ênang, klei đĭ kyar dlông rŏng lăn. Đại tướng Phan Văn Giang, Khua phŭn bruă lĭng kahan lač:

Liăp 11 h 30’ hrue 30/4/1975, Kdrăn mblah djap anăn Hồ Chí Minh mâo leh klei dưi kluôm dhuôm, mjưh ruĕ hŏng klei jăk siam klei kdơ̆ng mblah Mi, mtlaih ala čar. Anăn jing boh tŭ dưn năng êdi kơ wang êlan bi blah bŏ hŏng klei dleh dlan, klei lông dlăng prŏng, hŏng lu klei săn asei djiê êngiă lu êdi mơ̆ng lĭng kahan lehanăn mnuih ƀuôn sang pô.

Klei dưi prŏng yan mnga thŭn 1975 jing klei bi knăl kơ hdră êlan cách mạng čŏng hŏng klei knhêč, hlăm klei kiă kriê djŏ klă mơ̆ng Đảng; jing klei dưi mơ̆ng ai ktang hlăm klei mnuih ƀuôn sang bi blah, bi êdah klei yuôm bhăn mơ̆ng klei thâo khăp kơ lăn čar, nao mđrĭng hŏng ai tiê čiăng sua wĭt ênŭm klei êngiê kơ lăn čar, hlăm klei êpa mhao kơ klei êđăp ênang, mơ̆ng klei ktang thâo bi mguôp djuê ana, bi mguôp mbĭt hŏng klei ktang mơ̆ng ênuk mrâo mrang”.

 Leh 50 thŭn êgao, kluôm ala hlăk lŏ dưn yua jih klei tŭ dưn, lehanăn mă klei hriăm mơ̆ng klei dưi prŏng yan mnga thŭn 1975, čhuang nao hlăm ênuk gưl mrâo, kpưn đĭ tui duah klei sah mdrŏng, klei kdrăm k’ah, “Mnuih ƀuôn sang mdrŏng sah, ala čar ktang kjăp, hnŭk êngiê, mtăp mđơr, kreh dhar”./.