Klă klơ̆ng ti êlan Hồ Chí Minh kdrêč găn ƀuôn hgŭm Quảng Thành, ƀuôn prŏng Gia Nghĩa, mâo klei klưh hroh êbeh 3m. Anôk klưh hroh anei lŏ dôk mâo prŏng, huĭ srăng hmăi truh kơ hlăm brô 100 gŏ êsei mnuih ƀuôn sang. ti krĭng knông să Quảng Trực, kdriêk Tuy Đức, anôk klưh hroh lăn ăt dôk mâo prŏng lehanăn lŏ mâo anôk klưh hroh mrâo, truh 80m.

Bruă knŭk kna mbĕ leh 66 gŏ êsei ti ƀuôn Bu Krắk, Bu Prơ̆ng čuăl krĭng amâo lui mnuih ƀuôn sang nao mŭt hlăm dŭm krĭng anei. Kjham hĭn ti knơ̆ng kdơ̆ng êa Dak N’ting, să Quảng Sơn, kdriêk Dak Glong, knơ̆ng kdơ̆ng êa mâo lu anôk kđang nah dlông lehanăn nah tluôn, huĭ srăng mčah knơ̆ng dkơ̆ng êa. Leh nao ksiêm dlăng ti dŭm anôk klưh hroh, ti anôk bi kƀĭn hruê 5/8, Khua anôk bruă sang čư̆ êa čar Dak Nông mtă kơ dŭm knơ̆ng, dhar bruă, alŭ wăl mđing ksiêm dlăng, mbĕ mnuih ƀuôn sang ti anôk huĭ hyưt. Anôk bruă êlan klông čar Dak Nông lehanăn bruă sang čư̆ êa ƀuôn prŏng Gia Nghĩa mkra leh mnư̆ gang, mtă brei răng ti ktuê êlan dêč Gia Nghĩa (mkŏ êlan dơ̆ng prŏng mrô 14 hŏng êlan dơ̆ng prŏng mrô 28).