Lê Đình Tuấn, khua bruă sang čư êa să Quảng Sơn, kdriêk Dak Glŏng brei thâo, hjan prŏng hlăm lu hruê ngă kơ knơ̆ng kdơ̆ng êa Dak N’ting, ti akŏ hnoh N’Ting, ƀuôn N’Ting mâo klei klưh ksak, kđang joh ti dŭm bĭt anôk giăm jơ̆ng knơ̆ng êa. Kyuanăn bruă sang čư êa să mbĕ mđuê̆ mjêč 34 gŏ sang ti krĭng nah tluôn kbiă mơ̆ng anôk huĭ hyưt.

Hluê si bruă sang čư êa kdriêk Dak Glŏng, čŏng čư̆ nah điâo knơ̆ng kdơ̆ng êa ƀuôn N’Ting mâo gru kđang hlăm brô 500m, prŏng mơ̆ng 10cm. Pô duh bi liê knơ̆ng kdơ̆ng êa anei jing Êpul kriê dlăng dŭm hdră mkŏ mkra čar Dak Nông mâo leh klei hưn mơĭt kơ bruă sang čư êa čar Dak Nông, akâo brei tiŏ nao êpul bi klă phŭn agha mơ̆ng klei dlưh kđang anei ăt msĕ mơh mâo hdră êlan rơ̆ng klei êđăp ênang jŭm dar knơ̆ng kdơ̆ng êa.