Hluê si klei bi mklă mrô 969, Khua anôk bruă sang čư̆ êa čar Dak Nông bi mklăba mtrŭn klei răng mjêč hŏng 3 hdră bruă, mâo: Knơ̆ng kdơ̆ng êa Dak N’ting, să Quảng Sơn, kdriêk Dak Glŏng; êlan Hồ Chí Minh ti Km 1.900+350, ƀuôn hgŭm Nghĩa Thành, ƀuôn prŏng Gia Nghĩa; krĭng Ƀuôn Bu Krăc lehanăn Ƀuôn Bu Prơ̆ng 1A, să Quảng Trực, kdriêk Tuy Đức.

Kñăm mdrơ̆ng hŏng klei yan adiê ngă, Khua anôk bruă sang čư̆ êa čar Dak Nông mtă brei dưm pŏk hưn brei răng, kăm êpul, mnuih amâo mâo bruă klam nao mŭt hlăm dŭm krĭng anei, mbĕ jih mnuih ƀuôn sang hmăi djŏ, mkŏ mjing hdră dôk gak jih hruê mlam; Ksiêm dlăng klei mâo mơ̆ng yan adiê lehanăn dŭm hdră bruă anei čiăng pral mâo hdră msir mghaih./.