Dak Nông bi hrŏ ênoh gŏ êsei ƀun pral êdi krĭng Lăn dap kngư. Anei jing klei hưn ti Anôk bi kƀĭn phung bi ala mnuih djuê ƀiă čar Dak Nông tal IV, thŭn 2024, mphŭn pŏk aguah mbruê 15.10 hŏng klei hgŭm mơ̆ng 250 čô bi ala kơ êbeh 227.000 čô mnuih djuê ƀiă hlăm kluôm čar.

Wưng thŭn 2019 - 2024, mbĭt hŏng dŭm hdră mtrŭn mơ̆ng Gưl dlông, čar Dak Nông bi mguôp djăp klei găl mâo pŏk ngă lu hdră bruă duh kơ anôk bruă nah gŭ, bi lu jơr hdră duh ƀơ̆ng, mđĭ kyar gru hmô bi hrŏ ƀun, msir mghaih klei kƀah lăn dôk, lăn pla mjing. Mơ̆ng anăn, ênoh gŏ ếei ƀun mnuih djuê ƀiă čar Dak Nông hrŏ mơ̆ng 30,14% thŭn 2019 trŭn adôk 13,24% hlăm knhal jih thŭn 2023. Hluê si Ngô Thanh Danh, Khua bruă Đảng čar Dak Nông, hdră djuê ana lehanăn bruă hluê ngă hdră mtrŭn djuê ana ti alŭ wăl ba wĭt leh boh tŭ dưn jăk. Hlăm wưng ti anăp, čar Dak Nông gĭr bi hrŏ ênoh gŏ êsei ƀun trŭn ti gŭ 10%, 70% ênoh să krĭng mnuih djuê ƀiă lehanăn čư̆ čhiăng mâo djăp hnơ̆ng čuăn krĭng ƀuôn sang mrâo./.