Hluê si klei hưn mơ̆ng bruă sang čư êa čar Dak Nông, Êpul grup mă hdăng – mnơ̆ng gŭ lăn Việt Nam (TKV) mâo leh Phŭn bruă ngăn dŏ leh anăn wăl hdĭp mda brei hră dưi mă mnơ̆ng gŭ lăn ti anôk kuai mă Bausit Nhân Cơ, kdriêk Dak R’Lâp hŏng ênhă 3.074ha, wưng kuai mă jing 30 thŭn. Truh kơ ară anei, TKV kuai mă jih leh Bausit hlăm ênhă 310ha.

Ênhă lăn anei dưi čuk hli, pla ana akasi čiăng krŭ wĭt wăl hdĭp mda. Hluê si klei bi klă klei hmăi kơ wăl hdĭp mda, ênhă lăn anei leh jih hruê hlăm hră brei klei dưi kơh lŏ ba wĭt kơ alŭ wăl. Hluê si bruă sang čư êa čar Dak Nông, hŏng ênhă lăn leh jih Bausit msĕ sơnăn srăng mâo klei găl kơ čar dưi iêo mthưr dŭm hdră duh bi liê mđĭ kyar bruă duh mkra ala ƀuôn leh anăn mâo ênhă lăn doh čiăng lŏ wĭt mkra anôk dôk đru kơ bruă kuai mă Bausit mtam.