Tui si knơ̆ng bruă êlan klông čar Dak Nông, gưl adiê hjan prŏng hlăk knhal jih mlan 7 lehanăn akŏ mlan 8 leh êgao, mâo dua bĭt anôk jhat rai prŏng kơ êlan klông hlăm čar, jing 300m êlan Hồ Chí Minh găn ƀuôn hgŭm Nghĩa Thành, ƀuôn prŏng Gia Nghĩa; 850m êlan dơ̆ng čar mrô 1 hlăm să Quảng Tâm, kdriêk Tuy Đức. Jih dua kdrêč êlan anei lĕ hlăm klei jhat rai kjham êdi. Knơ̆ng bruă sang čư̆ êa čar Daknông mâo leh asăp mtrŭn brei răng hlăm êlan anei, lehanăn čiăng kơ dŭm dhar bruă pral lŏ mkra wĭt êlan klông.

Siămdah bruă lŏ mkra wĭt ka mâo ngăn prăk bi liê ôh, lehanăn ka thâo mơh dŭm ênoh srăng bi liê. Tui si klei tĭng mă snăn, năng ai hlăm brô 300 êklai prăk pioh lŏ mkra wĭt êlan klông jhat rai anei. Hlăm anăn, čar akâo leh kơ gưl dlông đru 150 êklai prăk pioh mă mơ̆ng ngăn prăk mghaih msir boh mơ̆ng klei yan adiê ngă, pioh mkra wĭt êlan dơ̆ng čar mrô 1. Bi êlan Hồ Chí Minh, čar akâo leh kơ phŭn bruă êlan klông dŭ mdiăng bi klă kơ ênoh bi liê, lehanăn klei srăng mkra wĭt./.