Anei jing dŭm ênoh mrô mrâo mâo Knơ̆ng bruă sang čư̆ êa čar Dak Nông hưn hlăm Anôk bruă gĭt gai ala čar kơ hdră gang mkhư̆ yan adiê ngă. Mơ̆ng hruê 28/7 truh hruê 28/8, ti čar Dak Nông mâo adiê hjan prŏng sui ti lu anôk ngă êngăp êa ti lu krĭng mnuih ƀuôn sang dôk leh anăn klưh hroh lăn ti đa đa anôk, ngă kơ 2 čô mnuih djiê, 275 boh sang êngăp êa, êbeh 700 ha ana pla mjing leh anăn hlăm brô 230 ha anôk rông kan hdang jhat rai.

Ênoh luč liê đăo tĭng truh 1.046 êklai prăk. Hlăm gưl anei, Knơ̆ng bruă sang čư̆ êa čar Dak Nông mâo leh 2 blư̆ hưn boh klei mjêč kơ yan adiê ngă. Bruă msir mgaih klei êa lip, yan adiê ngă ti čar Dak Nông dôk tuôm hŏng lu klei dleh dlan. Ară anei, keh gang mkư̆ yan adiê ngă ti čar knŏng dôk 2 êklai 9 êtuh êklăk prăk. Hlăk êjai prăk mkăp mơ̆ng čar thŭn 2023 knŏng êbeh 74 êklai prăk. Kyua anăn, Knơ̆ng bruă sang čư̆ êa čar Dak Nông akâo kơ Anôk bruă gĭt gai ala čar gang mkhư̆ klei yan adiê ngă, kčĕ hŏng Khua knŭk kna đru prăk mơ̆ng knơ̆ng prăk gưl dlông kơ čar hŏng ênoh 661 êklai prăk.