Ênao êa Tà Đùng – ênao phŭn pui kmlă Đồng Nai 3, ti kdriêk Dak Glong, čar Dak Nông, jing anôk hdĭp mda mơ̆ng dŭm êtuh gŏ êsei mnuih ƀuôn sang rông kan hlăm war, trah mă kan hlăm ênao êa leh anăn atăt phung tuê hiu čhưn ênguê hŏng mran. Hlăm ênao êa ară anei mâo 6 anôk rông kan, grăp anôk mâo hlăm brô 4-5 gŏ êsei. Mâo êpul bruă kăp lač, ktrâo lač kjăp dŭm hdră msir rơ̆ng êđăp ênang čiăng gang mkhư̆ klei mngăt hlăm êa, răng mgang êa leh anăn dliê, Bùi Văn Điệp, pô rông kan hlăm war ti ênao Tà Đùng 3 thŭn êgao, brei thâo: Rông snăn êlâo hĭn pô răng kriê wăl hdĭp mda, djăp mta bruă bi răng kriê bi jăk, doh. Bi klei êđăp ênang snăn pô ăt rơ̆ng mơh, msĕ si ba ao mlut, huĭ tăm mâo klei amâo jăk snăn ăt jăk kơ pô. Bi kơ dliê snăn tinei arăng hâo hưn nanao mơh, pô ăt kăn koh kyâo, kyua anăn jing wăl dliê ala čar, wăl răng mgang.

Mbĭt hŏng 6 anôk rông kan hlăm war, ênao Tà Đùng lŏ mâo 3 kdrŭn mran čih anăn ngă bruă ba phung tuê hiu čhưn. Anôk bruă kriê dlăng klei êđăp ênang čar Dak Nông ngă leh klei ksiêm dlăng čih anăn, čhŏng mran ngă bruă, kdrăp mnơ̆ng rơ̆ng êđăp ênang msĕ si ao mlut, ao mlut kăp đru dŏng, kdrăp mnơ̆ng gang mkhư̆ klei pui ƀơ̆ng… Trần Quốc Long, Khua sa knơ̆ng bruă hiu čhưn ênguê tinei brei thâo: Phung mă bruă hmei dưi hriăm mjuăt, mkăp hră bi mklă mgăt mran mdiăng tuê hiu čhưn. Leh anăn phung mă bruă dưi hriăm mjuăt bruă hiu čhưn ênguê kyua Knơ̆ng bruă dhar kreh mjuăt ktang asei mlei hiu čhưn ênguê Dak Nông mkŏ mjing. Hmei ăt čiăng kơ Knơ̆ng bruă sang čư̆ êa čar leh anăn dŭm anôk bruă mjing klei găl kơ anôk bruă mnia blei ti alŭ wăl Tà Đùng jing êpul bruă mkŏ mjing adŭ hriăm bi mklă hră dưi mă bruă čiăng kơ grăp čô mnuih dưi ngă leh anăn mđĭ klei thâo pô ngă bruă duh hiu čhưn ênguê.

Hlue si klei ksiêm yap mơ̆ng anôk bruă djŏ tuôm, ti ênao Tà Đùng - phŭn pui kmlă Đồng Nai 3 leh anăn 4 ti kdriêk Dak Glong mâo 34 boh čhong mran hiu čhưn ênguê leh anăn kanô dôk mă bruă. Mơ̆ng bruă ksiêm dlăng, êpul bruă djŏ tuôm ƀuh sa anôk bruă mâo 4 boh mram jih wưng dưi ba yua. Êngao anăn, lŏ mâo lu kdrăp čhŏng, mran ka ngă hră mơar. Hlue si Lê Đình Hải, K’iăng Khua adŭ bruă kriê dlăng kdrăp mnơ̆ng leh anăn pô mgăt - Knơ̆ng bruă êlan klông dŭ mdiăng Dak Nông, anei jing klei dleh dlan hŏng alŭ wăl leh mâo lu čhŏng mran jing kdrăp čŏng mkra mjing, amâo djăp klei găl dưi êran:Knơ̆ng bruă êlan klông dŭ mdiăng ăt khăng bi hgŭm hŏng dŭm anôk bruă mlir mđĭ bruă hâo hưn mtô mblang, mtrŭt mnuih ƀuôn sang msir mgaih klei čhŏng mran amâo djăp klei dưi êran, čih anăn ngă bruă hlue si hdră kčah. Mbĭt anăn anôk bruă čih anăn jing Anôk bruă čih anăn ngă bruă mrô 5 ti Nha Trang ăt bi hgŭm jăk hŏng alŭ wăl anei ktrâo lač kơ mnuih ƀuôn sang nanao ƀiădah dŭm kdrăp anei jing čŏng mkra mjing hlue si klei thâo mơ̆ng đưm, amâo mâo hră mơar ôh anăn amâo djăp klei găl ngă hră mơar dưi ba ngă bruă.

Êngao kơ bruă ktrâo lač kơ mnuih ƀuôn sang čih anăn, ngă hră kơ kdrăp mnơ̆ng hlue si hdră kčah, mđup brei ao mlut kơ dŭm gŏ êsei rông kan hlăm war leh anăn hdĭp djiêu ênao êa, dŭm bruă djŏ tuôm ti Dak Nông ăt khăng ksiêm dlăng, hâo hưn, rơ̆ng êđăp ênang kơ dŭm bruă ngă ti ênao Tà Đùng. Hlue anăn mtă kơ pô kdrăp mnơ̆ng, čhŏng mran, cano hiu čhưn ênguê amâo mdiăng êgao hnơ̆ng ôh ênoh mnuih kčah, dôk jưh djŏ anôk, mtă kơ phung tuê hơ ô ao mlut sĭt găn êrô hlăm ênao êa…

Dưi dlăng jing Vịnh Hạ Long ti čư̆ hlăm Lăn Dap Kngư, ƀiădah bruă hiu čhưn ênguê ti ênao Tà Đùng ăt dôk čŏng ngă leh anăn čŏng mâo. Wăt tơdah ară anei ka mâo ôh klei bi drăm, ƀiădah bruă hiu čhưn ênguê Tà Đùng čiăng snăk êpul bruă kriê dlăng kjăp leh anăn jăk čiăng rơ̆ng êđăp ênang hĭn kơ tuê hiu čhưn.

Êlâo kơ Tết thŭn anei, Khua knŭk kna mâo leh hră mơar rơ̆ng êđăp ênang hlăm êlan klông, klei găn êrô hlăm gưl Tết. Hlăm anăn, Khua knŭk kna mtă kơ dŭm alŭ wăl mdĭ ktang bruă ksiêm dlăng, msir mgaih bi jăk dŭm klei ngă soh hlăm êlan klông, êlan êdeh treng, êlan êa. Msir mgaih bi jăk phung amâo ô ao mlut sĭt đĭ mran, găn êrô hlăm êa amâo mprăp djăp kdrăp mlut, pô gĭt gai kdrăp mnơ̆ng amâo mâo hră bi mklă amâo djŏ guôp… Ksiêm dlăng bruă hlue ngă hdră kčah mơ̆ng hdră bhiăn kơ bruă rơ̆ng êđăp ênang, klei êđăp ênang hlăm êlan klông, klei êđăp ênang ti kdrŭn êa krông, čhŏng mran mdiăng tuê hiu čhưn, dŭm ktuê êlan êa, boh nik dŭm ktuê êlan mdiăng tuê mơ̆ng hang nao ti plao ksĭ, dŭm ktuê êlan êa krông leh anăn krĭng êa mkŏ mjing knăm mơak./.