Leh 50 thŭn mâo klei êngiê, mơ̆ng sa boh čar čư̆ čhiăng dôk hlăm klei ƀun ƀin, Daklak đĭ kyar leh jing sa boh čar mdrŏng sah, jing anôk phŭn kơ klei duh mkra lehanăn bruă kđi čar lăn dap kngư. Klei duh mkra čar mâo hlăm 10 thŭn êgao giăm 6,15%/thŭn.

Hnơ̆ng bruă duh mkra mâo pŏk mlar nanao, truh thŭn 2024 djă akŏ alŭ wăl lăn dap kngư, dôk tal dua hlăm alŭ wăl ktue hang ksĭ kwar krah lehanăn lăn dap kngư. Blŭ hrăm bi hdơr 50 thŭn klei mblah dưi Ƀuôn Ama Thuôt, k’iăng khua knŭk kna Trần Hồng Hà mtă kơ čar lŏ dơ̆ng mjing kdrông mkŏ lăn dap kngư hŏng jih jang alŭ wăl. Hlăm anăn rŭ mdơ̆ng ƀuôn prŏng Ƀuôn Ama Thuôt jing ƀuôn prŏng knơ̆ng, jing mdah mơ̆ng krĭng lăn dap kngư, ñu kma bruă duh mkra hŏng tač êngao, jing ƀuôn prŏng mtah, doh, thâo mĭn, jiă knhuah gru dhar kreh, jing anôk bi hmô kơ ƀuôn prŏng siă suôr hŏng dhar kreh lehanăn dliê kmrơ̆ng. K’iăng khua knŭk kna čang hmăng lehanăn đăo knang kơ bruă Đảng, bruă sang čư̆ êa lehanăn mnuih ƀuôn sang djăp djuê ana hlăm čar dưn yua lu hĭn boh mơ̆ng klei dưi Ƀuôn Ama thhuôt, lŏ dơ̆ng čhuang hlăm ênuk gưl mrâo, mđĭ kyar mdrŏng sah, trei mđao, lehanăn jăk yâo./.