Hrue mbrue 20-3, Khua knơ̆ng kiă kriê sang phat kđi gưl dlông Nguyễn Hòa Bình lehanăn khua knơ̆ng kiă kriê bruă kăp ksiêm kđi klei gưl dlông Lê Minh Trí wĭt lač leh klei êmuh ti anôk bi kƀĭn tal 21 mơ̆ng Dhar bruă gĭt gai Bruă kƀĭn ala gưl 15. Klei êmuh anei mâo mkŏ mjing mđup rup ti mmông anăn mtam hŏng 62 Êpul bi ala bruă kƀĭn ala dŭm boh čar, ƀuôn prŏng hlăm gưl dlông. 

Nao ti anôk êmuh anei hlăm anôk  mkŏ hŏng čar Daklak, pô bi ala Nguyễn Thị Thu Nguyệt, Êpul bi ala bruă kƀĭn ala čar Daklak brei thâo; Hlăm klei êmuh anei Êpul bi ala bruă kƀĭn ala čar Daklak akâo bi mngač djăp hdră mghaih msir klei Sang phat kđi dŭm gưl phat mkra kđi klei soh mnuih soh kđi, ba yua klei mgăl kđi amâo mâo djŏ hŏng hdră mtrŭn, čoh čuăn kđi klei leh phat amâo mâo djŏ hŏng hdră kčah, thâodah êdu hĕ đei, hdră msir jih jang bruă adôk ka djŏ, bi mâo hĕ hdră êlan bi jăk... Snăn dua čô khua kiă kriê lač anăn mâo leh klei wĭt lač klă mngač, lehanăn mâo bruă đua klam./.