Ti anôk bi tuôm anei, 138 čô phung bi ala kơ phung kreh knhâo, phung thâo lu hlăk dôk ngă bruă hlăm adjăp anôk thŭn leh êgao. Mơ̆ng anăn mâo klei akâo kơ dŭm bruă ngă kreh knhâo hĭn, bi êdah djăp bruă kdŏ muiñ hlăm wưng ti anăp. Blŭ hrăm ti anôk bi tuôm phung khua kiă kriê čar Daklak lač, thŭn 2022, klei duh mkra ala ƀuôn hlăm čar mâo leh klei bi mlih jăk. Jih jang ênoh čuăn kčah dưi djăp.

Bruă sang hră mơar, bruă mdrao mgŭn, bruă răng mgang klei êđăp ênang mâo krơ̆ng kjăp. Dưi mâo hĕ boh tŭ dưn anei jing leh klei đru mguôp amâo mâo djŏ ƀiă ôh mơ̆ng phung kreh knhâo ngă bruă lač anăn. Thŭn 2023, phung khua kiă kriê čar Daklak čang hmăng kơ phung kreh knhâo thâo lu lŏ dơ̆ng mđĭ hĭn bruă pô, đru mtrŭt mđĭ klei hgŭm bruă duh mkra mnia mblei hlăm alŭ wăl./.