Dŭm anôk mplĕ hră ti dŭm boh ƀuôn hgŭm Hòa Phú, Buôn Đôn, Ia Rvê, Ia Lốp lehanăn dŭm boh ƀuôn hgŭm Buôn Ma Thuột, Bình Kiến. Phung nao mplĕ hră jing lĭng kahan hlăm knơ̆ng bruă kahan čar, kahan răng mgang knông lăn, lehanăn kahan ksiêm čar. Mmông mplĕ hră mơ̆ng 7h truh 19h hrue  14/3. Hlăm anăn, kahan răng mgang knông lăn mâo 8 anôk mplĕ hră hnưm ti dŭm kđông kahan răng mgang knông lăn lehanăn dŭm êpul bruă djŏ tuôm, kahan ksiêm čar mkŏ mjing ti dua anôk ti  mrô 58 Nguyễn Tất Thành lehanăn 457 Lê Duẩn; dŭm êpul êya mkŏ mjing ti sang bi kƀĭn Tiểu đoàn kahan jơ̆ng 303 lehanăn dŭm êpul êya djŏ tuôm.

Čiăng rơ̆ng kơ bruă mplĕ hră hnưm djŏ hŏng klei čoh čuăn, êđăp ênang, hnŭk êngiê, anôk bruă kiă kriê klei ruah khua čar Daklak mtă kơ dŭm êpul êya mkŏ mjing hdră mă bruă klă mngač, ksiêm wĭt jih jang bruă leh mprăp, mđĭ hĭn klei hâo hưn, mƀlir anăn mnuih nao ruah, hrue mmông anôk mplĕ hră. kahan ksiêm hlăm alŭ wăl kiă kriê kjăp ênoh anăn, lehanăn klei ba yua VNeID pioh kăp dlăng, đăm lĕ hlăm klei kƀah lehanăn čhuai. kluôm čar ară anei mâo 2.118 Êpul bruă ruah khua ti 2.119 alŭ wăl mplĕ hră hlăm 102 boh ƀuôn hgŭm. bruă mkŏ mjing klei ruah khua hnưm kơ lĭng kahan bi êdah klei čŏng mprăp ngă jăk jih jang bruă hlăm čar Daklak, rơ̆ng kơ klei dưi hŏgn grăp čô mơ̆ng knuă druh, lĭng kahan, lehanăn răng mgang kjăp klei êđăp ênang, čiăng kơ bruă ruah khua phung bi ala bruă kƀĭn ala gưl 16, lehanăn êpul gơ̆ng bruă ƀuôn sang dŭm gưl thŭn 2026–2031.