Anăn jing sa hlăm dŭm klei knơ̆ng bruă sang čư̆ êa čar Daknông pioh mđĭ pral bruă bi liê prăk knŭk kna. Thŭn 2023, ênoh jih jang klei duh bi liê mơ̆ng bruă knŭk kna ti čar Daknông 3.473 êklai prăk. Truh jih mlan, kluôm čar mâo bi liê 185 êklai prăk, djăp êbeh 5% hdră kčah. Hjăn hŏng hdră ala čar kñăm thŭn 2023 hŏng ênoh jih jang truh 1.120 êklai prăk ƀiădah ka bi liê ôh. Lehanăn prăk mơ̆ng thŭn 2022 kơ hdră ala čar kñăm jing 758 êklai prăk, čar knŏng mrâo ba yua mil 17%.

 Ti anôk bi kƀĭn kơ ngăn prăk duh bi liê mơ̆ng knŭk kna mrâo anei, Hồ Văn Mười, Khua knơ̆ng bruă sang čư̆ êa čar Daknông mtă leh kơ dŭm kdriêk, ƀuôn prŏng dŭm knơ̆ng dhar bruă lŏ mâo hdră êlan ngă bruă kjăp hĭn, čiăng mâo hdră êlan yua prăk duh bi liê hŏng klei djŏ. Truh hrue  30/6/2023, jih jang djăp mta bruă ka rŭ mkra ôh, ka mâo klei duh bi liê ngă prăk mơh, snăn srăng khăt ba jao kơ bruă mkăn ngă jăk hĭn ktưn truh knhal jih thŭn 2023 mâo bi liê êbeh 95%.