Khua bruă kƀĭn ala Vương Đình Huệ blŭ hrăm pŏk leh anăn bi ruê̆ gưl ksiêm êmuh leh anăn wĭt lač klei êmuh anei. Khua phŭn bruă hdră bhiăn Lê Thành Long kñăm wĭt lač kơ phung bi ala Bruă kƀĭn ala kơ bruă hluê ngă bruă čih mkra hdră bhiăn, dŭm hdră êlan rơ̆ng kơ klei mă bruă, hnơ̆ng tŭ jăk leh anăn hră mơar dŭm hdră, klei hưn mdah knŭk kna hŏng Bruă kƀĭn ala, hdră êlan mđĭ hnơ̆ng tŭ jăk hdră bhiăn, hdră êlan ksiêm dlăng klei dưi, gang mkhư̆ klei ƀơ̆ng ngăn, klei amâo mâo jăk hlăm bruă mkŏ mjing hdră bhiăn hlăm bruă klam mơ̆ng knŭk kna.

Bi kơ boh klei hlăm bruă klam mơ̆ng Phŭn bruă lŏ hma leh anăn mđĭ kyar krĭng ƀuôn sang, Khua phŭn bruă Lê Minh Hoan wĭt lač kơ dŭm hdră êlan ruh mgaih klei dleh dlan kơ bruă mnia mblei boh mnga, mbĭt hŏng anăn jing bruă trah mă, răng mgang leh anăn mđĭ kyar kan hdang, hdră êlan ruh mgaih hră kñĭ mơ̆ng Dhar bruă Ơrôp (EC) hŏng kan hdang. Bruă mlih mta kñăm ba yua, hrui wĭt lăn pla mdiê, rơ̆ng bi mâo djăp mnơ̆ng ƀơ̆ng huă leh anăn mnia mblei braih.