Djŏ tuôm hŏng klei truh kjham ti kdriêk Čư̆ Pưh, čar Gia Lai ngă 3 čô hlăm êpul hgŭm čưng boh HAGL djiê, hrue mbrue 13/8, Khuất Việt Hùng- K’iăng khua kiă kriê bruă mơ̆ng anôk răng mgang klei êđăp ênang êlan klông mâo leh mmông ngă bruă hŏng knơ̆ng bruă sang čư̆ êa kdriêk Čư̆ Pưh kñăm rơ̆ng bi mâo klei êđăp ênang êlan klông hlăm kdrêč êlan dơ̆ng prŏng mrô 14 găn hlăm kdriêk, lehanăn čuă êmuh gŏ sang mâo klei truh. Tui si klei hưn, mơ̆ng akŏ thŭn truh kơ ară anei, ti kdriêk mâo leh truh 13 klei truh hlăm êlan klông, ngă truh 10 čô mnuih djiê, 4 čô êka.

Klei truh mrâo anei ti kdrêč êlan 31 km êlan dơ̆ng prŏng mrô 14 găn kdriêk. Blŭ hrăm ti anôk ngă bruă, Khuất Việt Hùng mtă kơ knơ̆ng bruă sang čư̆ êa kdriêk Čư̆ Pưh tiŏ nao jih êpul êya mghaih msir klei truh tơl, mghaih msir bi ktang klei ngă soh, lehanăn mkŏ camera ksiêm dlăng hlă êlan klông. Anôk bruă răng mgang klei êđăp ênang êlan klông čang hmăng kơ čar  Gia Lai mâo dŭm hdră kjăp nanao, lehanăn čuăl mkă anôk mnuih ƀuôn sang dôk ktue dua nah êlan mrô 14 bi rơ̆ng kjăp klei êđăp ênang hlăm êlan klông./.