Hlăm bruă ksiêm dlăng kơ hdră anei, Êpul  ngă bruă mơ̆ng anôk bruă bi mguôp tar rŏng lăn Dhŭng Korea (KOICA) mâo leh mmông mă bruă hŏng bruă sang čư̆ êa wăl krah Ƀuôn Hồ, čar Dak Lak tlam mbruê 8/1. Jung Jaewoo, k’iăng khua kiă kriê ala čar, adŭ bruă KOICA Việt Nam brei thâo, anei jing sa hdră mâo knŭk kna Dhŭng Korea bi klă, mmông ngă hdră mơ̆ng 2025 – 2029.

Kdrăp mgaih msir êa djah dưi rŭ mjing ti wăl krah Ƀuôn Hồ čar Dak Lak, mâo anôk mgaih msir êa djah sa bĭt hŏng hnơ̆ng hlăm brô 1.500 m3 hlăm sa hruê mlam leh anăn dŭm hdră đru, dŭm êlan đĭng êa mkŏ, hrui mă mâo boh taih giăm 70km. Mta kñăm truh ti thŭn 2032 srăng mâo hlăm brô 2.900 gŏ sang dưi mkŏ, đru bi hrŏ klei amâo mâo jăk hŏng klei suaih pral mnuih ƀuôn sang leh anăn bi hrŏ klei čhŏ djhan wăl hdĭp mda kyua êa ka dưi mgaih msir êlâo kơ mđoh hlăm wăl hdĭp mda.