Anei jing klei hưn hlăm klei kƀĭn bruă klei mrâo aguah mbruê 27/2 mơ̆ng phŭn bruă lĭng kahan bi mguôp hŏng bruă Đảng čar Dak Lak mkŏ mjing. Klei kƀĭn trông kñăm bi klă, bi êlam hĭn kơ kơhưm, boh tŭ yuôm mơ̆ng klei mblah dưi Lăn Dap Kngư hlăm klei kdơ̆ng mbah Mi, dŏng mtlaih lăn čar, phŭn agha klei mblah dưi, klei hriăm mâo čiăng lư̆ dưn yau hlăm bruă mkŏ mjing leh anăn răng mgang lăn čar ară anei.

Mbĭt anăn, bi êdah dŭm boh tŭ dưn mơ̆ng bruă Đảng čar, bruă sang čư̆ êa leh anăn mnuih ƀuôn sang dŭm čar Lăn Dap Kngư hlăm anăn mâo čar Dak Lak leh 50 thŭn mgaih msir klei kpĕ êka mơ̆ng klei bi blah, bi lar boh tŭ klei êđăp ênang leh anăn ai tiê kdơ̆ng mblah mơ̆ng klei mblah dưi Lăn Dap Kngư thŭn 1975 hlăm bruă mlih mrâo. Lŏ dơ̆ng bi lar knhuah gru dhar kreh djuê ana leh anăn klei găl mơ̆ng čar, bi râo klei mĭn leh anăn klei hmăng hmưi kpưn đĭ hlăm ênuk mrâo mơ̆ng djuê ana, mkŏ mjing krĭng hdră êlan Lăn Dap Kngư leh anăn čar Dak Lak ƀrư̆ hruê ƀrư̆ mdrŏng siam, mrâo mrang.