Tết thŭn anei truh hnưm, gŏ sang aduôn Y Phương, ti ƀuôn Đăk Boi, wăk krah Đăk Glei, čar Kon Tum ăt mtluk mtlak hĭn mkă hŏng grăp thŭn. Mrâo rŭ ênhă hbei ƀlang ka yŏng hmao čhĭ kơ sang măi mkra mjing, gŏ sang lŏ wĭr kơ bruă kih êmiêt pưk sang. Sang dôk sui leh leh, thŭn anei mâo ênoh prăk mơ̆ng bruă ba čhĭ boh mnga bruă lŏ hma, gŏ sang kah sa kdrêč lŏ wĭt măl êa mĭl sang dôk. Dŭm mta mnơ̆ng yua msĕ si gŏ wưng, hmăng êa sô siă ñu ăt blei mlih dŏ mrâo. Dlăng kơ phung hđeh čŭt čhum ao mrâo êran hiu mơ̆ng sang truh kơ kang êlan ngă kơ ai êwa ti gŏ sang Aduôn Y Phương hlăm dŭm hruê knhal jih thŭn lŏ h’up mđao, yâo mơak hĭn. Aduôn Y Phương hơ̆k mơak brei thâo, gŏ sang mprăp ênŭm leh mnơ̆ng ƀơ̆ng, êa mnăm, boh nik jing dŭm mta mnơ̆ng ƀơ̆ng knhuah gru mnuih Sơdang čiăng drông tết, mơak yan Mnga.

Mmông mprăp drông thŭn mrâo jing wưng gŏ sang mrâo leh puôt mdiê, gui mdiê wĭt kơ sang. Mdiê mâo hlăm brô 70,80 kdô. Drông thŭn mrâo gŏ sang kâo čuh sa drei ŭn, ăm êsei brông. Leh mprăp ênŭm dŭm mta mnơ̆ng ƀơ̆ng knhuah gru, mkŏ mjing klei ngă yang akâo kơ gŏ sang mâo klei suiah pral, mă bruă knuă mbhă myun. Leh kơnăn, mơak hĭn jing mmông hđeh êdam êra tông čing, kdŏ muñ, grăp čô hlăm gŏ sang hrăm mbĭt mnăm kpiê čeh, ƀơ̆ng dŭm mta mnơ̆ng ƀơ̆ng djuê ana.”

Dŭm hruê giăm Tết, gŏ sang Rơ Mah H’Peng leh anăn mnuih ƀuôn sang hlăm ƀuôn Thơ Nhueng, să Ia Phang, kdriêk Čư̆ Pưh, čar Gia Lai mơak snăk.  Mnuih ƀuôn sang lŏ bi tŭ ư hrăm mbĭt kih mdoh pưk sang ƀuôn êlan, koh ana kyâo mtâo, êmiêt djah djâo djăp ktuê êlan điêt, prŏng. Grăp boh sang pla thăm ana kyâo mtah ti krĭng êlan ƀuôn sang pô, bi msiam ƀăng jang leh anăn ki mdoh pưk sang čiăng mprăp drông thŭn bhang mrâo. Hlue si amai H’Peng, thŭn anei, mnuih ƀuôn sang drông tết hŏng klei mơak:

 “Jih gŏ sang mprăp êmiêt pưk sang doh, koh mdoh wăl sang bi jăk, bi doh êlan klông, ƀuôn êlan čiăng drông ayŏng adei, ƀĭng găp nao hơêč hmưi thŭn bhang mrâo.  Hơ̆k mơak thŭn mrâo grăp čô mnuih hơk mơak, bi tuôm, huă mnăm, bi hơêč hmưi klei suaih pral. Leh anăn bi blŭ hrăm, yăl dliê kơ sa thŭn duh ƀơ̆ng, klei hdĭp grăp hruê, bi trông kơ hdră kriê dlăng đang pla mjing, boh kroh si ngă čiăng tŭ dưn, čiăng kơ klei hdĭp mnuih ƀuôn sang dĭ kyar, klei hdĭp mlih mrâo leh anăn kjăp.

   Alŭ Kon Chrah, să Hà Ra, kriêk Mang Yang, čar Gia Lai mâo 180 gŏ sang hŏng 970 čô mnuih ƀuôn sang. Drông Tết Quý Mão thŭn anei, mnuih ƀuôn sang hlăm ƀuôn lŏ wĭt mkra bi jăk, kih êmiêt pưk sang. Phung mniê nao sang mnia plei kpŭng, blei bêñ. Khua alŭ Hrun brei thâo, êlâo dih mnuih ƀuôn sang ăt ƀiă sơnăk drông tết, amâo thâo mkŏ mjing tết. Dŭm thŭn giăm anei, mâo klei uêñ mĭn mơ̆ng bruă sang čư̆ êa alŭ wăl hŏng klei kah ssa kdrêč ngăn prăk mđup brei kơ mnuih ƀuôn sang hmei rông ŭn, rông mnŭ čiăng kơ mnuih ƀuôn sang hơ̆k mơak mbĭt, kyuanăn mnuih ƀuôn sang hơ̆k mơak êdi sĭt truh Tết.

 “Mphŭn dô mnuih ƀuôn sang amâo mâo thâo, ƀiădah ară anei mâo Đảng, knŭk kna, bruă sang čư̆ êa uêñ mĭn, đru brei prăk kăk, mkŏ mjing tết kơ ƀuôn sang. Tal sa mnuih ƀuôn sang hơ̆k mơak, ngă lŏ mâo mdiê, ngă hma mâo kphê. Tal 2, klei ruă tưp Covid-19 dưi ksiêm dlăng, kyuanăn thŭn anei mnuih ƀuôn sang hơ̆k mơak drông tết, mâo kpiê čeh, mâo čĭm mnŭ, bruă sang čư̆ êa să grăp thŭn ăt mkŏ mjing tết kơ mnuih ƀuôn sang.”

 Chôn, mnuih ƀuôn sang ti ƀuôn Tuơh Kơtu, să Glar, kdriêk Đak Đoa, čar Gia Lai snăn brei thâo: Thŭn êgao, lu gŏ sang hlăm ƀuôn mâo prăk hrui wĭt lu, êdah êdi msĕ si: gŏ sang khua mduôn Anŭ, gŏ sang Nết, gŏ sang Ƀyêu…kah knar mơ̆ng 150 truh 200 êklăk prăk. Hjăn gŏ sang Chôn thŭn mrâo êgao hrui mă êbeh 100 êklăk prăk mơ̆ng kphê leh anăn tiu… anăn hơ̆k mơak snăn leh drông yan mnga, mơak Tết djuê ana. Gŏ sang blei djăp mnơ̆ng ƀơ̆ng huă, êa mnăm, ƀêñ, keŏ … kơ gŏ sang. Chôn mơak brei thâo:

             “Thŭn anei snăn kphê, mdiê, hbei ƀlang ti krĭng Bahnar să Glar pô djŏ yan, anăn têt truh mnuih ƀuôn sang ăt mơak mơh, amâo msĕ si thŭn 2021 mâo klei ruă tưp, klei hdĭp bŏ hŏng rŭng răng. Hĭn mơh, thŭn anei kphê, dmiê ăt mâo ênoh hĭn anăn mnuih ƀuôn sang ăt mơak, grăp čô mnuih, grăp boh sang mơak drông thŭn 2023 leh anăn đăo klei hdĭp srăng kjăp hĭn”

 Gưl Tết truh, bruă sang čư̆ êa dŭm čar Lăn Dap Kngư pioh klei mđing uêñ, kriê dlăng têt kơ phung knŭk kna dlăng ba, gŏ êsei mâo klei hdĭp dleh dlan čiăng kơ grăp boh sang mâo Tết sơăi. Hjăn hlăm gưl Tết anei, mơ̆ng bruă mtrŭt mjhar, iêô mthưr mơ̆ng dŭm phŭn đru, Knơ̆ng bruă mặt trận čar kwar Dak Lak tŭ mă leh êbeh 2 êlai 6 êtuh êklăk prăk, Lê Xuân Sương, K’iăng Khua bruă mặt trận čar kwar čar Dak Lak brei thâo, mơ̆ng ênoh anei, bruă mặt trận čar kwar dŭm gưl mđup brei mnơ̆ng kơ gŏ sang dleh dlan, đru kơ diñu mâo thiăm klei găl mơak yan mnga, drông tết.

        Phung mâo ai tiê kmah, dŭm anôk bruă duh mkra, phung mâo ai tiê kmah hrăm mbĭt hŏng bruă mặt trận, hrăm mbĭt hŏng mnuih ƀun amâo djŏ jing hlăm hruê Tết Nguyên đán ôh, ƀiădah hlăk êjai găn klei ruă tưp, yan diê ngă, angina êbŭ. Pô jing mnuih ba ênoh đru anăn kơ gŏ êsei ƀun. Hjăn gưl čar êbeh 4 êbâo hnư mnơ̆ng. Bi ti 15 kdriêk, wăl krah, ƀuôn prŏng truh ti wưng anei ăt đru leh giăm 20 êbâo hnư mnơ̆ng.